ازيا بانكى قازاقستانعا قارجى قۇيا ما: قۇرىلتاي ماڭىزدى كەلىسىمدى ءبىرىنشى وقىلىمدا قارايدى

قۇجات كولىك، ەنەرگەتيكا، سيفرلىق بايلانىس جانە باسقا دا ماڭىزدى سالالارداعى جوبالاردى قارجىلاندىرۋعا جول اشىپ، بيۋجەتكە تۇسەتىن جۇكتەمەنى ازايتۋعا باعىتتالعان.

قۇرىلتاي سپيكەرى ايبەك دادەبايدىڭ توراعالىعىمەن وتكەن بيۋرو وتىرىسىندا الداعى وتىرىستىڭ كۇن ءتارتىبى بەلگىلەندى.

كەلىسىم ينفراقۇرىلىمدىق جوبالاردى قارجىلاندىرۋ قۇرالدارىن كەڭەيتۋگە جانە نەعۇرلىم شۇعىل جوبالارعا مەملەكەت شىعىستارىن قايتا ءبولۋ ەسەبىنەن بيۋجەتكە تۇسەتىن جۇكتەمەنى ازايتۋعا باعىتتالعان. سونىمەن قوسا بۇل قۇجات قارجىلاندىرۋدىڭ باسىم سەكتورلارىن ايقىنداۋعا، سونداي- اق جوبالاردى ىسكە اسىرۋ راسىمدەرىن وڭتايلاندىرۋعا ءتيىس.

كەلىسىمدى راتيفيكاتسيالاۋ ازيا ينفراقۇرىلىمدىق ينۆەستيتسيالار بانكىمەن اراداعى بىرلەسكەن باستامالاردى ىسكە اسىرۋدىڭ تيىمدىلىگىن ارتتىرۋعا ىقپال ەتەدى. بۇل رەتتە، قازاقستانعا كولىك، ەنەرگەتيكا، تسيفرلىق بايلانىستار جانە ەكونوميكانىڭ باسقا دا سەكتورلارىنداعى جوبالاردى قارجىلاندىرۋ ءۇشىن ۇزاق مەرزىمدى ينۆەستيتسيالار تارتۋ مۇمكىندگى بەرىلەدى.

ءبىرىنشى وقىلىمدا 1959-جىلى 20-ساۋىردە ستراسبۋرگتە جاسالعان قىلمىستىق ىستەر بويىنشا ءوزارا قۇقىقتىق كومەك تۋرالى ەۋروپالىق كونۆەنتسيانى راتيفيكاتسيالاۋ تۋرالى زاڭ جوباسى دا قارالادى. كونۆەنتسياعا قوسىلۋ قازاقستانعا ەلىمىزدىڭ قۇقىق قورعاۋ ورگاندارىنىڭ وندىرىسىندەگى قىلمىستىق ىستەر بويىنشا دالەلدەمەلەر الۋعا جانە زاڭسىز جولمەن الىنعان شەتەلگە شىعارىلعان اكتيۆتەردى ەلگە قايتارۋعا مۇمكىندىك بەرەدى. بۇل قىلمىستىق ىستەردى، سونىڭ ىشىندە ترانسۇلتتىق قىلمىسپەن بايلانىستى ىستەردى تەرگەۋدىڭ جەدەلدىگى مەن تيىمدىلىگىن ارتتىرادى.

بيۋرو سونداي-اق 1-شاقىرىلعان قازاقستان رەسپۋبليكاسى قۇرىلتايىنىڭ وكىلەتتىگىن ىسكە اسىرۋدىڭ ءبىرىنشى سەسسياعا ارنالعان نەگىزگى ءىس-شارالار جوسپارىن بەكىتتى. جوسپارعا ەلدىڭ الەۋمەتتىك-ەكونوميكالىق دامۋىنا، مەملەكەتتىك قىزمەتتەر كورسەتۋ ساپاسىنا، وڭىرلەردى دامىتۋعا، بيزنەستى، اۋىل شارۋاشىلىعىن، عىلىم مەن تسيفرلاندىرۋدى قولداۋعا، سونداي-اق ازاماتتاردىڭ قاۋىپسىزدىگى مەن قۇقىقتارىن قورعاۋعا تىكەلەي بايلانىستى ماسەلەلەر ەنگىزىلىپ وتىر.

ءىس-شارالار جوسپارىندا قۇرىلتايدىڭ تىڭداۋلارى، جوعارى اۋديتورلىق پالاتانىڭ ەسەپتەرى، «ۇكىمەت ساعاتتارى»، كوميتەتتەردىڭ كوشپەلى وتىرىستارى، «دوڭگەلەك ۇستەلدەر»، كوميتەتتەردىڭ تاقىرىپتىق وتىرىستارى، پارلامەنتارالىق جانە حالىقارالىق قىزمەت سياقتى بولىمدەر كىرەدى.

سونىمەن قاتار، بيۋرو وتىرىسىندا قازاقستان رەسپۋبليكاسى قۇرىلتاي ءتوراعاسىنىڭ جانىنان دەپۋتاتتىق ادەپ كەڭەسىن قۇرۋ تۋرالى شەشىم قابىلداندى. ونىڭ قۇرامىنا قۇرىلتايداعى بارلىق تۇراقتى كوميتەتتەردىڭ، سونداي-اق بارلىق ساياسي پارتيالار فراكسيالارىنىڭ وكىلدەرى كىردى.

ايتا كەتەيىك، ۇلتتىق قوردىڭ تازا ۆاليۋتالىق اكتيۆتەرى 2027-جىلى 65,2 ميلليارد ا ق ش دوللارى دەڭگەيىندە بولجانىپ وتىر. بۇل تۋرالى قۇرىلتايدا 2027-2029-جىلدارعا ارنالعان الەۋمەتتىك-ەكونوميكالىق دامۋ بولجامىن تانىستىرۋ كەزىندە ۇلتتىق ەكونوميكا ءبىرىنشى ۆيتسە-ءمينيسترى ازامات ءامرين ايتتى.