«گازا سەكتورىندا اتىستى توقتاتۋعا تىرىسامىن»: ترامپ پالەستينا باسشىسىنا ءسوز بەردى

استانا. KAZINFORM - ا ق ش-تىڭ جاڭادان سايلانعان پرەزيدەنتى دونالد ترامپ جۇما كۇنى پالەستينا ۇلتتىق اكىمشىلىك باسشىسى ماحمۋد ابباسپەن تەلەفون ارقىلى سويلەسىپ، گازا سەكتورىندا اتىستى توقتاتۋ جۇمىستارىنا اتسالىساتىنىن ايتتى. 

بۇل ولاردىڭ 2017 -جىلدان بەرگى العاشقى تىلدەسۋى، دەپ حابارلايدى Kazinform Axios-قا سىلتەمە جاساپ.

دونالد ترامپ پەن ماحمۋد ابباس ا ق ش پرەزيدەنتى يەرۋساليم قالاسىن يزرايل استاناسى دەپ تانيتىنىن جاريالاپ، وندا امەريكا ەلشىلىگىن ورنالاستىرعاننان سوڭ سويلەسپەگەن. بۇل تىلدەسۋ پالەستينا باسشىلىعى ترامپپەن قارىم- قاتىناستىڭ جاڭا كەزەڭىن باستاۋعا دايىن ەكەندىگىن بىلدىرەتىن بەلگى بولدى.

وتكەن جىلدىڭ شىلدەسىندە ترامپ ابباستان كەلگەن حاتتى جاريالادى. وندا پالەستينا باسشىسى تاياۋ شىعىستاعى احۋالعا بايلانىستى الاڭداۋشىلىق تانىتاتىنىن ايتىپ، وڭىردە بەيبىتشىلىكتى ساقتاۋ ءۇشىن بارىن سالاتىنىن ايتقان.

«ابباس ترامپتى جاڭا مەرزىمگە پرەزيدەنتتىك لاۋازىمعا سايلانۋىمەن قۇتتىقتاپ، وعان قىزمەتىندە ساتتىلىك تىلەدى. ول، سونداي- اق، ترامپپەن بىرگە حالىقارالىق لەگيتيمدىلىك پەن قاعيداتتارعا نەگىزدەلگەن ادىلەتتى ءارى كەڭ قامتىمدى الەم قالىپتاستىرۋ باعىتىندا جۇمىس ىستەۋگە ءازىر ەكەنىن جەتكىزدى» دەلىنگەن پالەستينا باسشىلىعىنىڭ حابارلاماسىندا.

- ءوز كەزەگىندە ترامپ سوعىستىڭ توقتاۋىن قالايتىنىن، ول ءۇشىن پرەزيدەنت ابباسپەن دە، وزگە وڭىرلىك ءارى جاھاندىق مۇددەلى تاراپتارمەن دە ايماقتا بەيبىتشىلىك ورناۋى ءۇشىن بىرلەسە جۇمىس ىستەۋگە دايىن ەكەنىن ءبىلدىردى، - دەپ حابارلايدى پالەستينا پرەزيدەنتتىگىنىڭ وكىلدەرى.

ايتا كەتەيىك، بۇعان دەيىن ساراپشىلار ترامپتىڭ جەڭىسى مەن مۇناي باعاسىنىڭ قۇبىلۋى تەڭگەگە قالاي اسەر ەتەتىنىن ايتىپ بەردى.

اۆتور

ەربول جانات