ايەلدەر مەن بالالاردىڭ قۇقىعىن قورعاۋدىڭ ءتيىمدى جۇيەسى قالىپتاستى - ەرلان قارين
استانا. KAZINFORM - مەملەكەتتىك كەڭەسشى ەرلان قارين تۇرمىستىق زورلىق-زومبىلىققا قارسى كۇرەس تۋرالى زاڭنىڭ قابىلدانعانىنا ءبىر جىل تولىپ، وسى مەرزىمدە ىستەلگەن جۇمىستارعا توقتالىپ ءوتتى.
تۇرمىستىق زورلىق-زومبىلىققا قارسى كۇرەس تۋرالى زاڭنىڭ قابىلدانعانىنا ءبىر جىل تولدى.
- پرەزيدەنت 2024 -جىلعى 15-ساۋىردە قول قويعان ايەلدەردىڭ قۇقىقتارىن قورعاۋ جانە بالالاردىڭ قاۋىپسىزدىگى تۋرالى زاڭ بىلتىر 16 - ماۋسىم كۇنى كۇشىنە ەندى. مەملەكەت باسشىسى بيلىككە كەلگەن كەزدەن باستاپ ايەلدەر مەن بالالاردىڭ قۇقىعىن قورعاۋ ساياساتىن جۇيەلى تۇردە جۇرگىزىپ كەلەدى. قاسىم-جومارت توقايەۆ تۇرمىستىق زورلىق- زومبىلىققا قارسى ىمىراسىز كۇرەسۋ ءوزىنىڭ مىزعىماس ۇستانىمى ەكەنىن ۇنەمى ايتىپ ءجۇر، - دەدى مەملەكەتتىك كەڭەسشى.
قابىلدانعان زاڭنىڭ جانە مەملەكەت جۇزەگە اسىرىپ جاتقان ناقتى شارالاردىڭ ناتيجەسىندە قازاقستاندا ايەلدەر مەن بالالاردىڭ قۇقىعىن قورعاۋدىڭ وزىق زاڭنامالارى مەن ءتيىمدى جۇيەسى قالىپتاستى.
- ناتيجەسىندە وتباسىلىق-تۇرمىستىق زورلىق- زومبىلىق فاكتىلەرى ەداۋىر ازايدى. مىسالى، جىل باسىنان بەرى قۇزىرلى ورگاندارعا تۇرمىستىق زورلىق-زومبىلىققا قاتىستى تۇسكەن ارىزداردىڭ سانى بىلتىرعى وسى ۋاقپەن سالىستىرعاندا %20,5 عا تومەندەدى. بۇعان قوسا اۋىر جانە اسا اۋىر سيپاتتاعى تۇرمىستىق قىلمىستىڭ سانى ازايعان. جىل باسىنان بەرگى بەس ايدا اسا اۋىر تۇرمىستىق قىلمىس %44 عا، اۋىر وتباسىلىق- تۇرمىستىق قىلمىس %29 عا تومەندەگەن. سونىمەن قاتار، بەس ايدا كامەلەت جاسىنا تولماعاندارعا قارسى جاسالعان جىنىستىق سيپاتتاعى قىلمىس سانى %21,3 عا، پەدوفيلياعا قاتىستى قىلمىس سانى %40,7 عا ازايعان. جالپى، مەملەكەت تاراپىنان قولعا الىنعان ۇيىمداستىرۋ شارالارى مەن قۇقىقتىق شارالاردىڭ ناتيجەسىندە سوڭعى بەس جىلدا ايەلدەردىڭ قۇقىقتارىن بۇزعان قىلمىس سانى ەكى ەسە ازايعان، - دەپ جازدى ەرلان قارين.
جازانىڭ كۇشەيتىلۋى مەن الدىن الۋ شارالارىنىڭ جاڭا تاسىلدەرى ءوز جەمىسىن بەرىپ جاتىر.
1. وتباسىلىق-تۇرمىستىق قۇقىق بۇزۋشىلىقتاردى انىقتاۋ كورسەتكىشتەرى ايتارلىقتاي ارتتى. جاڭا ءتاسىلدىڭ، ياعني، رەسمي تۇردە ارىز بەرىلمەسە دە، وڭىرلەردە قۇرىلعان جەدەل توپتاردىڭ، پوليتسيا قىزمەتكەرلەرىنىڭ، كۋاگەرلەردىڭ بەرگەن دەرەكتەرى مەن الەۋمەتتىك جەلىلەردى ساراپتاۋدىڭ ناتيجەسىندە بيىلعى قاڭتار-مامىر ايلارىندا 19 مىڭنان استام وسىنداي وقيعا انىقتالدى.
2. مەكتەپتەرگە «111» مەملەكەتتىك بايلانىس ورتالىعىنىڭ QR كودى ورناتىلعاننان كەيىن بالالار اراسىنداعى زورلىق-زومبىلىق، بۋللينگ، كۇردەلى پسيحيكالىق-ەموتسيالىق جاعدايلاردى انىقتاۋ كورسەتكىشى ارتتى. بيىل 5 ايدىڭ ىشىندە 86 مىڭ بالا وسى قىزمەت تۇرىنە جۇگىنگەن. سونىڭ ىشىندە 2 مىڭنان استام بالا زورلىق- زومبىلىقتان، بۋللينگتەن، سىنىپتاستارىمەن، اتا- اناسىمەن كۇردەلى قارىم- قاتىناستان كۇيزەلىسكە تۇسكەنىن ايتىپ كومەك سۇراعان. بالالار وزىنە ءوزى قول جۇمساماق بولعان 28 وقيعا انىقتالىپ، قاتەردىڭ بەتى قايتارىلعان. «111» قىزمەتىنە حابارلاسقان ازاماتتاردىڭ سانى دا كوبەيىپ كەلەدى. سوڭعى بەس ايدا بۇل نومىرگە بالالاردىڭ قاۋىپسىزدىگىن قامتاماسىز ەتۋ، پسيحولوگيالىق كومەك الۋ جانە وتباسىلىق- تۇرمىستىق زورلىق-زومبىلىق فاكتىلەرىن ايتۋ ءۇشىن جانە باسقا دا الەۋمەتتىك ماسەلەلەرمەن 62 مىڭ ەرەسەك ادام حابارلاسقان.
3. وتباسىلارعا، ايەلدەر مەن بالالارعا كومەك كورسەتۋ اۋقىمى كەڭەيدى. قازىرگە دەيىن پسيحولوگيالىق كومەك كورسەتەتىن 20 ورتالىق اشىلدى. ەلىمىزدەگى 112 قالا مەن اۋداندا وتباسىلاردى قولداۋ ورتالىقتارى جۇمىس ىستەپ تۇر. وسى جىلدىڭ العاشقى توقسانىنىڭ وزىندە 34 مىڭ وتباسىنا الەۋمەتتىك، پسيحولوگيالىق جانە قۇقىقتىق كومەك كورسەتىلدى، 2 مىڭ وتباسىنا ءالى دە كومەك كورسەتىلىپ جاتىر.
4. اگرەسسورمەن پسيحولوگيالىق جۇمىس جۇرگىزۋ زورلىق- زومبىلىقتىڭ الدىن الۋدىڭ جاڭا ءتاسىلى رەتىندە دامىپ كەلەدى. بيىل سوت ۇكىمىمەن 52 «بۇزاقى» دەنساۋلىق ساقتاۋ مەكەمەلەرىندە پسيحولوگيالىق كومەك الۋعا مىندەتتەلدى.
ايتا كەتەلىك ءىىم جىل سايىن تۇرمىستىق زورلىق- زومبىلىق تۋرالى 100 مىڭنان اسا حابارلاما تۇسەتىنىن ايتقان ەدى.
