اۋىلدارعا ينتەرنەت ورناتۋعا نە كەدەرگى - پرەزيدەنت كەڭەسشىسى جاۋاپ بەردى
استانا. KAZINFORM – ق ر پرەزيدەنتىنىڭ كەڭەسشىسى قۋانىشبەك ەسەكەيەۆ ەلىمىزدىڭ كەي اۋىلدارىندا نەگە ءالى كۇنگە دەيىن ينتەرنەت جوق ەكەنىن ءتۇسىندىردى.
سپيكەردىڭ ايتۋىنشا، ۇيالى بايلانىس سيگنالى بازالىق ستانسيالار ارقىلى جۇمىس ىستەيدى، بۇل ستانسيالار ەنەرگەتيكالىق ينفراقۇرىلىمعا تاۋەلدى.
− ابونەنت الاتىن كەز كەلگەن سيگنال بازالىق ستانتسيالاردىڭ ورناتىلۋىنا بايلانىستى. ءبىز قازىر وتىرعان عيماراتتا ءسىزدىڭ ۇيالى تەلەفونىڭىزعا شامامەن 3-4 بازالىق ستانسيا سيگنال بەرەدى. اۋىلدارداعى بايلانىس ماسەلەسى بازالىق ستانتسيا سالۋ ءۇشىن ەنەرگەتيكانىڭ قاجەتتىگىمەن بايلانىستى. تەلەكوممۋنيكاتسيا يندۋسترياسى، اسىرەسە ۇيالى بايلانىس تىكەلەي ەنەرگەتيكاعا تاۋەلدى، سەبەبى سيگنال بەرەتىن راديو بولىگى ەلەكتر قۋاتىنسىز جۇمىس ىستەمەيدى، - دەپ ءتۇسىندىردى كەڭەسشى «Jibek Joly» تەلەارناسىنداعى «ۋادە» باعدارلاماسىندا.
سونىمەن بىرگە، باعدارلاما قوناعى بازالىق ستانسيالاردى پايدالانۋ جەرگىلىكتى جەر بەدەرىنە دە بايلانىستى ەكەنىن ايتۋدا.
− مىسالى، تاۋلى جەر بەدەرىندە بازالىق ستانسيالاردى پايدالانۋ قيىن. سوندىقتان بايلانىستىڭ اۋقىمى - ۇنەمى نازاردا بولاتىن ماسەلە. قازىر ەل اۋماعىنىڭ نەگىزگى بولىگىندە 3G سيگنالى بار. ءبىراق تۇتىنۋشىلار قالىپتاسقان داعدىسىمەن 4G سيگنالىن تالاپ ەتەدى. سول سەبەپتى 4G سيگنالىمەن قامتۋدى ءاردايىم ۇلعايتىپ وتىرۋعا تۋرا كەلەدى. ءدال وسىنداي ماسەلە قالالارداعى «سۇر ايماقتاردا» دا بار. مىسالى، كولىك كەپتەلىسىندە ءتورت ادام وتىرسا، ولاردىڭ ۇشەۋى %90 جاعدايدا تەلەفون قاراپ وتىرادى. كولىكتەر سانى كوپ بولسا، بازالىق ستانتسيانىڭ جۇكتەمەسى دە ارتادى. سول سەبەپتى جوعارى جۇكتەمە بولعان ايماقتاردا باسقا ابونەنتتەردىڭ سيگنال دەڭگەيى تومەندەي باستايدى، - دەدى ق. ەسەكەيەۆ.
ونىڭ ايتۋىنشا، قازىر ءبىر ادامعا شاققانداعى تۇتىنۋ كولەمى ورتا ەسەپپەن %30 عا ارتقان، سوندىقتان بۇل جۇمىس ۇزدىكسىز جۇرگىزىلۋدە، وعان مەملەكەت ءتۇرلى جولدارمەن قارجى ءبولىپ وتىر.
بۇعان دەيىن قۋانىشبەك ەسەكەيەۆ قازاقستان اۋىلدارىنداعى ينتەرنەت ماسەلەسى قاشان تولىق شەشىلەتىنىن ايتقان ەدى.
سونداي-اق، ق. ەسەكەيەۆ «قازاق تەلەكومنىڭ» مونوپوليست اتانعانى تۋرالى پىكىرلەرگە جاۋاپ بەردى.
