اۋىل شارۋاشىلىعىندا ءبىر دە ءبىر مەملەكەتتىك باعدارلاما سوڭىنا دەيىن ىسكە اسپاعان - دەپۋتات

 استانا. KAZINFORM - ەلىمىزدە ازىق- تۇلىك قاۋىپسىزدىگى تۋرالى زاڭ جوباسى قابىلدانۋى قاجەت. بۇل تۋرالى ءماجىلىس دەپۋتاتى اناس باققوجايەۆ باستاما كوتەردى.

«ەكونوميكانىڭ ءوسۋ قارقىنى بويىنشا اگرارلى سالا ەڭ تومەنگى كورسەتكىشكە يە. 2005 -جىلدان بەرى اۋىل شارۋاشىلىعى بويىنشا قابىلدانعان بىردە-ءبىر مەملەكەتتىك باعدارلامالا سوڭىنا دەيىن ىسكە اسپاعان. اگرارلى ساياساتتىڭ تۇراقسىزدىعى سونشالىق، سوڭعى 20 -جىلدا سۋبسيديا بەرۋ ەرەجەلەرى 57 رەت وزگەرگەن. ناتيجەسىندە اۋىل شارۋاشىلىعى سىبايلاس جەمقورلىق قاتەرى جوعارى سالالاردىڭ قاتارىنا كىردى»، - دەدى دەپۋتات ءماجىلىستىڭ جالپى وتىرىسىندا.

ونىڭ ايتۋىنشا، سوڭعى 10 جىلدا دۇكەن سورەلەرىندەگى يمپورتتىق تاۋارلار ۇلەسى 3 ەسە وسكەن. قانشا باعدارلاما جاسالسا دا، ەلدەگى قايتا وڭدەۋ كاسىپورىنداردىڭ ناقتى ءوندىرىس قۋاتى 30 پايىزدان اسقان ەمەس. وعان قوسا، ءبىرقاتار ەكسپورتتىق باعىتتاردى ەلىمىز ۋىسىنان شىعارىپ الدى.

«باعا ساياساتى فەرمەرلەردىڭ ەمەس، الىپساتارلاردىڭ قولىندا. ولاردىڭ پايداسى شارۋالارعا قاراعاندا 4 ەسە كوپ. اۋىل ادامدارىنىڭ نەسىبەسىن بازار قاقپاسىن تورلاعان دەلدالدار الىپ ءجۇر. بازارلاردا مال شارۋاشىلىعى ونىمدەرىن تەكسەرەتىن ۆەتەريناريالىق- سانيتاريالىق زەرتحانالار جەكە- مەنشىكتىڭ قولىندا بولعان سوڭ، ولاردىڭ ساپاسى شالا تەكسەرىلەدى. مۇنداعى ەڭ وكىنىشتىسى - سوڭعى 5 جىلدا جازداعى قۇرعاقشىلىق پەن قىس مەزگىلىندەگى مال جۇتى قالىپتى جاعدايعا اينالدى. وسىنداي جاعدايدا تۇراقتى كومەكتەسەتىن جۇيە جوق»، - دەدى ول.

سونىمەن بىرگە، ەلەكتر ەنەرگياسى، جىلۋ مەن كوممۋنالدىق تاريفتەردىڭ ءوسۋى تالاي جوبالاردىڭ دامۋىنا كەدەرگى كەلتىرگەن.

«سوڭعى جىلدارى اگروسالاعا جەكە ينۆەستيتسيالار ءالسىن-ءالسىن كەلە باستاعان ەدى، جاڭا بيزنەسمەندەر وسىنداي تۇراقسىزدىقتى كورىپ، اۋىل شارۋاشىلىعىنان ات- تونىن الا قاشتى. كوپتەگەن شارۋاشىلىقتار ساتىلىپ جاتىر. مۇنىڭ ءبارى ازىق- تۇلىك قاۋىپسىزدىگىنە ارنالعان ارنايى زاڭنىڭ جوقتىعىنان بولىپ وتىر. „اۋىل“ پارتياسى ازىق- تۇلىك قاۋىپسىزدىگى تۋرالى زاڭ جوباسىن ازىرلەپ، ۇكىمەتتىڭ قاراۋىنا جىبەرگەن بولاتىن. الايدا ءتيىستى قولداۋ تاپپادى. وسىعان بايلانىستى „اۋىل“ فراكسياسىنىڭ دەپۋتاتتارى ازىق- تۇلىك قاۋىپسىزدىگى تۋرالى زاڭ جوباسى ۇكىمەت دەڭگەيىندە قايتا قارالىپ، پىسىقتالۋىن تالاپ ەتەدى»، - دەدى ا. باققوجايەۆ.