اۋىل شارۋاشىلىعى تەحنيكاسىن دامىتۋعا ەلەۋلى سەرپىن بەرۋ قاجەت - ولجاس بەكتەنوۆ
استانا. KAZINFORM - ۇكىمەت باسشىسى ولجاس بەكتەنوۆ اقمولا وبلىسىنا جۇمىس ساپارى اياسىندا ءوڭىردىڭ ءبىرقاتار جۇيە قۇراۋشى ونەركاسىپتىك كاسىپورىندارىنا بارىپ، قۇرىلىس جانە جىلۋ وقشاۋلاعىش ماتەريالدار، اۋىل شارۋاشىلىعى جانە جۇك تەحنيكاسى ءوندىرىسىن ارتتىرۋ پەرسپەكتيۆالارىمەن تانىستى.
ق ر ۇكىمەتىنىڭ باسپا ءسوز قىزمەتى تاراتقان اقپاراتتارعا قاراعاندا، پرەمەر-مينيستر Kazrost engineering Ltd. كومپانياسى سەحتارىن ارالاپ كوردى. كاسىپورىن اۋىل شارۋاشىلىعى تەحنيكاسىن شىعارۋعا ماماندانعان، باعدارلامالاناتىن تالشىقتى- وپتيكالىق لازەرلىك ستانوكتارمەن، زاماناۋي تاباق يۋ جانە قۇبىر بۇككىش ستانوكتارمەن، جارتىلاي اۆتوماتتاندىرىلعان دانەكەرلەۋ اپپاراتتارىمەن، س ب ب بار جونۋ-فرەزەرلىك جابدىقتارىمەن جانە ءوندىرىس پروتسەسىنە قاجەتتى باسقا دا قۇرىلعىلارمەن جابدىقتالعان. زاۋىتتا جىل سايىن 1 مىڭ كومباين مەن 1 مىڭعا دەيىن تراكتور شىعارىلادى. كاسىپورىن استىقتى وڭىرلەردىڭ بىرىندە ورنالاسقاندىقتان وندىرىلەتىن ونىمگە سۇرانىس جوعارى. نەگىزگى تاپسىرىس بەرۋشى - «قازاگروقارجى» ا ق.
Kazrost Engineering Ltd. باسقارۋشى ديرەكتورى دارىن يمانمۇسايەۆ ءوندىرىستى كەڭەيتۋ جانە مودەلدىك قاتاردى ۇلعايتۋ جونىندەگى الداعى جوسپارلار تۋرالى باياندادى. لوكاليزاتسيانى تەرەڭدەتۋ جانە قازاقستاندىق قامتۋ كولەمىن ۇلعايتۋ ماقساتىندا كابينالار، كولبەۋ كامەرالار مەن كاپوتتار ءوندىرىسى بويىنشا قوسىمشا سەح سالىنىپ، زاماناۋي جابدىقتارمەن جاراقتاندىرىلاتىن بولادى. قازىرگى ۋاقىتتا جوبالاۋ جانە جوبالاۋ الدىنداعى قۇجاتتاما پىسىقتالۋدا.
ولجاس بەكتەنوۆ اۋىل شارۋاشىلىعى سالاسىندا ماشينا جاساۋدى دامىتۋعا ەلەۋلى سەرپىن بەرۋ قاجەتتىگىن اتاپ ءوتتى. اتالعان باعىتتا ۇكىمەت وتاندىق كاسىپورىنداردى قولداۋعا نيەتتى، سونداي- اق Kazrost engineering Ltd.،Claas جانە باسقالارىن مىسالعا الا وتىرىپ سالاداعى الەمدىك جەتەكشى كومپانيالار ءوندىرىسىن لوكاليزاتسيالاۋعا مۇددەلى. وسىعان بايلانىستى جاقىن ارادا وسىنداي كاسىپورىنداردى قولداۋدىڭ، ونىڭ ىشىندە يمپورتتىق تەحنيكانى سۋبسيديالاۋدان باس تارتۋ جانە قازاقستاندا وندىرىلگەن تەحنيكاعا سۋبسيديالاردى ارتتىرۋ جولىمەن قولداۋدىڭ جاڭا قۇرالدارى ەنگىزىلەتىن بولادى.
پرەمەر-مينيستر ماكينسك جىلۋ وقشاۋلاۋ زاۋىتىندا بولىپ، وندا ءوندىرىس بارىسىمەن تانىستى، جابدىقتار مەن دايىن ونىمدەردى قاراپ شىقتى. كاسىپورىن قۇرىلىس يندۋسترياسى ءۇشىن جوعارى ەكسپورتتىق الەۋەتى بار جىلۋ وقشاۋلاعىش ماتەريالدار شىعارادى. وندىرىستە يتاليالىق كومپانيانىڭ تەحنولوگيالىق جەلىسى ەنگىزىلگەن. زاۋىتتىڭ قۋاتتىلىعى جىلىنا 34 مىڭ توننا دايىن ءونىمدى قۇرايدى. مۇندا بازالت نەگىزىندەگى جىلۋ وقشاۋلاعىش ماتەريالداردىڭ بارلىق ءتۇرى، سونىڭ ىشىندە سەندۆيچ-پانەلدەرىنە ارنالعان پليتالار دا شىعارىلادى. 2024-جىلعى قاڭتار-ناۋرىز ايلارىندا 1,4 ميلليارد تەڭگەنىڭ 5832 توننا مينەرالدى ماقتا پليتالارى ءوندىرىلدى.
زاۋىتتىڭ باس ديرەكتورى جاسۇلان مۇحامەتجان ءونىم قۋاتىن جىلىنا 34 مىڭ توننادان 50-55 مىڭ توننا دايىن ونىمگە دەيىن ارتتىرۋ ءۇشىن سلوۆاكيالىق سەرىكتەستەرىمەن زاماناۋي سەنتريفۋگالاردى جەتكىزۋ جونىندەگى بىرلەسكەن جوبا تۋرالى ايتتى. بۇدان وزگە، جاڭعىرتۋ اياسىندا قورشاعان ورتاعا شىعارىلاتىن زياندى قالدىقتاردى قىسقارتۋ جوسپارلانىپ وتىر. زاۋىت جاڭا تەحنولوگيالاردى ەنگىزۋدىڭ ارقاسىندا بولاشاقتا قورشاعان ورتاعا تەرىس اسەرى جوق كاسىپورىندارعا بەرىلەتىن «جاسىل» ءوندىرىس مارتەبەسىن الۋعا نيەتتى.
كوكشەتاۋدا ۇكىمەت باسشىسى كەراميكالىق قاپتاما كىرپىش ءوندىرۋشى جەرگىلىكتى ENKI كاسىپورنىنىڭ الەۋەتىمەن تانىستى. ءبىر جىل ىشىندە ءوندىرىس كولەمى %16,5 عا ءوسىپ، 4,3 ميلليارد تەڭگەدەن استى. 2024-جىلعى قاڭتار-اقپان ايلارىندا 629 ميلليون تەڭگەنىڭ ءونىمى شىعارىلدى. بۇگىنگى تاڭدا زاۋىت %90 جۇمىس ىستەپ تۇر. ونىڭ جالپى جوبالىق قۋاتى جىلىنا 90 ميلليون كىرپىشتى قۇرايدى.
