ايدوس سارىم بيشىمبايەۆ ىسىندەگى سۋدياعا قىسىم جاساۋ فاكتىسى تۋرالى پىكىر ءبىلدىردى
استانا. KAZINFORM - ءماجىلىس دەپۋتاتى ايدوس سارىم ازاماتتىق نەكەدەگى ايەلىن اسقان قاتىگەزدىكپەن ءولتىردى دەپ ايىپتالعان ەكس- مينيستر قۋاندىق بيشىمبايەۆتىڭ ءىسىن جۇرگىزىپ كەلە جاتقان سۋديا ايجان قۇلبايەۆانىڭ تەلەفونىنا بەلگىسىز تەلەفوننان تۇسكەن قورقىتۋ حابارلامالارى تۋرالى پىكىر ءبىلدىردى.
«ەگەر سۋدياعا ايىپتالۋشى تاراپتان بەلگىلى ءبىر دارەجەدە قورقىتۋ، سەس كورسەتۋ دەگەن سياقتى نارسە بولسا، وعان قوسىمشا قىلمىستىق ءىس قوزعالۋ كەرەك، ول پروكۋراتۋرانىڭ قۇزىرىندا. سۋديانىڭ قۇقىعى، مارتەبەسى تۋرالى ارنايى كونستيتۋتسيالىق زاڭ بار. سول بويىنشا پروكۋراتۋراعا شاعىمدانسا، تاعىلىپ وتىرعان ايىپتارى وڭاي ەمەس قوي، سوعان كەمىندە 5-7 جىلعا دەيىن ايىپ تاعىلىپ، تۇرمەدە وتىرۋى مۇمكىن. ەندى ونسىز دا تۇرمەگە وتىراتىن سياقتى عوي. ءبىراق قوسىمشا سالماق بولۋى ىقتيمال»، - دەدى دەپۋتات.
ايدوس سارىم مۇنداي ارەكەتتى زاڭدى ورەسكەل بۇزۋ دەپ باعالايتىنىن ايتتى.
«بۇل كورگەنسىزدىك، باسقا ماسەلە ەمەس، زاڭدى ورەسكەل بۇزۋ، قىلمىستىق ءىس. مەيلى ول شاحتەر بولسىن، كەشەگى مينيستر بولسىن، سوت بارىسىندا سۋدياعا قوقان- لوققى جاساپ، قورقىتىپ ۇركىتسە، وتە اۋىر قىلمىستىڭ ءبىرى بولىپ ەسەپتەلەدى»، - دەدى ول.
ەسكە سالايىق، بۇگىن جوعارعى سوت بيشىمبايەۆ پەن بايجانوۆتىڭ ءىسىن جۇرگىزگەن سۋديا ايجان قۇلبايەۆاعا بەلگىسىز نومىردەن قوڭىراۋلار مەن قورقىتۋ حابارلامالارى تۇسكەنىن مالىمدەدى.
