پەداگوگ مارتەبەسى قالاي قورعالىپ جاتىر؟
استانا.قازاقپارات - قازاقستاندا پەداگوگتەردىڭ مارتەبەسىن كوتەرۋ جانە قۇقىقتارىن قورعاۋ باعىتىندا ءبىرقاتار وزگەرىستەر ەنگىزىلدى.
«پەداگوگ مارتەبەسى تۋرالى» زاڭ ارقىلى مۇعالىمدەردىڭ الەۋمەتتىك كەپىلدىكتەرى كەڭەيتىلىپ، ەڭبەك جاعدايىنا ەرەكشە كوڭىل بولىنۋدە.
پەداگوگتەرگە جىل سايىن 56 كۇن اقىلى ەڭبەك دەمالىسى بەرىلەدى جانە دەمالىس كەزىندە كەمىندە ءبىر لاۋازىمدىق ايلىقاقى كولەمىندە ساۋىقتىرۋ جاردەماقىسى تولەنەدى. سونىمەن قاتار ماگيستر دارەجەسى، تالىمگەرلىك جانە كەيبىر پاندەردى اعىلشىن تىلىندە وقىتۋ ءۇشىن قوسىمشا ۇستەماقىلار قاراستىرىلعان.
مۇعالىمدەرگە تۇرعىن ءۇي ماسەلەسىندە دە قولداۋ بار. پەداگوگتەر «وتاۋ» جانە «ناۋرىز» جەڭىلدەتىلگەن يپوتەكالىق باعدارلامالارىنا قاتىسا الادى. ال اۋىلعا جۇمىسقا بارعان جاس ماماندارعا «ديپلوممەن - اۋىلعا» باعدارلاماسى بويىنشا كوتەرمە جاردەماقى جانە جەڭىلدەتىلگەن تۇرعىن ءۇي نەسيەسى بەرىلەدى.
پەداگوگتەردى اتتەستاتتاۋ جۇيەسى دە وزگەردى. ەندى ەسسە، اۆتورلىق باعدارلاما نەمەسە وقۋ-ادىستەمەلىك ماتەريال ازىرلەۋ مىندەتتى ەمەس. مۇعالىمنىڭ كاسىبي قىزمەتى، ساباق وتكىزۋ ساپاسى، وقۋشىلاردىڭ جەتىستىكتەرى جانە كاسىبي دامۋى كەشەندى تۇردە باعالانادى.
سونىمەن قاتار مۇعالىمدەردى كاسىبي مىندەتىنە قاتىسى جوق جۇمىستارعا تارتۋعا جانە زاڭدا قاراستىرىلماعان قوسىمشا ەسەپتەردى تالاپ ەتۋگە بولمايدى. قۇقىعى بۇزىلعان جاعدايدا پەداگوگ شاعىم تۇسىرە الادى.
قورىتىندى: قازىرگى تاڭدا پەداگوگ مارتەبەسىن قورعاۋ تەك جالاقى مەن الەۋمەتتىك جەڭىلدىكتەرمەن شەكتەلمەي، مۇعالىمنىڭ ەڭبەك قۇقىعىن، كاسىبي ەركىندىگىن، بەدەلىن جانە الەۋمەتتىك جاعدايىن قورعاۋدى قامتيدى.
