اتىراۋدى شاڭدى داۋىل باسىپ تۇر
اتىراۋ. KAZINFORM - بۇگىن ءتۇس قايتا اتىراۋ قالاسىن شاڭدى داۋىل باستى. اۋادا ىزعار، قاتتى جەل بار.

مۇنايلى شاھاردا قاڭتار ايى باستالعالى 1-2 رەت قار جاۋعان ەدى. الايدا قار ەرىپ، قارا سۋىق سوعىپ تۇر.
ال كەشەدەن بەرى كۇن سۋىتىپ، بۇگىن شاڭدى داۋىل كوتەرىلدى. شاڭنىڭ كوتەرىلۋىنەن جەلدىڭ ەكپىنى بايقالادى.
اتىراۋ وبلىستىق توتەنشە جاعدايلار دەپارتامەنتى بىرنەشە كۇن بۇرىن تۇرعىندارعا داۋىل بولۋى مۇمكىن ەكەنىن ەسكەرتتى.
- داۋىل تۋرالى ەسكەرتۋلەر جاريالاعان كەزدە، اسىرەسە قاراڭعى مەزگىلدە الىس ساپارعا شىعۋدان باس تارتىپ، جاياۋ جۇرۋدەن اۋلاق بولۋ قاجەت. اۋا رايىنىڭ جاعدايى مەن اۆتوجولدارداعى كولىك قوزعالىسىنىڭ شەكتەۋلەرى تۋرالى اقپاراتتى باقىلاعان ءجون. بالالاردى قاراۋسىز قالدىرماعان دۇرىس. قاتتى اياز تەحنوگەندىك ورتتەردىڭ كوبەيۋىنە ىقپال ەتۋى مۇمكىن. وسىعان بايلانىستى جوعارى قۋاتتى ەلەكتر قۇرىلعىلارىن ءبىر ۋاقىتتا قوسۋ ارقىلى پەشتەردى قىزدىرماۋعا، ەلەكتر جەلىلەرىن شامادان تىس جۇكتەمەۋگە كەڭەس بەرەمىز. جۇرگىزۋشىلەرگە اشىق وتتىڭ كومەگىمەن اۆتوموبيلدەردى جىلىتۋدىڭ ءقاۋىپتى ەكەنىن ەسكەرتەمىز، - دەپ حابارلادى دەپارتامەنتتىڭ يميدجدىك جۇمىس جانە سىرتقى كوممۋنيكاتسيالار توبى.
ەسكە سالا كەتەلىك، بۇعان دەيىن اتىراۋدا 1 كۇن بۇرىن جوعالىپ كەتكەن ەر ادامنىڭ مۇردەسى جايىق وزەنىنەن تابىلعانىن جازعان بولاتىنبىز.
اۆتور
جولداسبەك شوپەعۇل