اتىراۋدا اسكەري تەحنيكانىڭ قوزعالىسىنا قاتىستى مينيسترلىك تۇسىنىكتەمە بەردى
اتىراۋ. KAZINFORM - اتىراۋ وبلىسىندا الەۋمەتتىك جەلىلەردە اسكەري تەحنيكالاردىڭ قوزعالىسى تۇسىرىلگەن فوتو مەن ۆيدەو تاراپ، كوپشىلىكتىڭ نازارىن اۋدارتتى.
جەلى قولدانۋشىلارى جىلىوي اۋدانىندا بايقالعان اسكەري تەحنيكالارعا قاتىستى ءتۇرلى جازبالار جاريالاپ، الاڭداۋشىلىق بىلدىرگەن.
وسىعان بايلانىستى قازاقستان رەسپۋبليكاسىنىڭ قورعانىس مينيسترلىگى رەسمي تۇسىنىكتەمە بەرىپ، الاڭداۋعا نەگىز جوق ەكەنىن مالىمدەدى.
- اۋە شابۋىلىنا قارسى قورعانىس بولىمشەلەرىنىڭ، سونىڭ ىشىندە تەمىرجول كولىگى ارقىلى ورىن اۋىستىرۋى جاۋىنگەرلىك دايارلىق ءىس- شارالارى اياسىندا جوسپارلى تۇردە جۇزەگە اسىرىلۋدا. قازىرگى ۋاقىتتا بولىمشەلەردىڭ موبيلدىلىگىن ارتتىرۋ، ءوزارا ۇيلەسىمدىلىگىن جەتىلدىرۋ جانە بەلگىلەنگەن مىندەتتەردى ورىنداۋعا دايىندىعىن ارتتىرۋ، سونىڭ ىشىندە ءبىرقاتار ماڭىزدى نىساندار مەن اۋدانداردى قورعاۋ ماسەلەلەرى پىسىقتالۋدا، - دەپ حابارلادى قورعانىس مينيسترلىگى.
مينيسترلىكتىڭ بەرگەن اقپاراتىنا سۇيەنسەك، مۇنداي ءىس-شارالار قارۋلى كۇشتەردىڭ جاۋىنگەرلىك دايارلىعىنىڭ ءبىر بولىگى بولىپ سانالادى جانە بەكىتىلگەن جوسپارعا سايكەس تۇراقتى تۇردە وتكىزىلەدى.
