اتىراۋدا 18 جاستاعى تۇرعىن ءدىني الاۋىزدىققا شاقىراتىن كىتاپتار تاراتقان
اتىراۋ. KAZINFORM - اتىراۋ وبلىسىندا تىيىم سالىنعان ءدىني ماتەريالداردى تاراتقان 18 جاستاعى تۇرعىن ۇستالدى. كۇدىكتىدەن ءدىني الاۋىزدىققا شاقىراتىن ءدىني كىتاپتار تاركىلەندى.
اتىراۋ وبلىستىق پوليتسيا دەپارتامەنتىنىڭ باسپا ءسوز قىزمەتىنەن مالىمەت ەتكەندەي، اتىراۋ جانە اقتوبە وبلىستارىنداعى ەكسترەميزمگە قارسى ءىس-قيمىل بولىنىستەرىنىڭ قىزمەتكەرلەرى بىرلەسكەن جەدەل ىزدەستىرۋ ءىس-شاراسىن جۇرگىزگەن. سول كەزدە كۇدىكتىنىڭ الەۋمەتتىك جەلىدە ءدىني الاۋىزدىققا شاقىراتىن، تىيىم سالىنعان ءدىني ماتەريالداردى تاراتۋمەن اينالىسقانى انىقتالعان.
«اتىراۋ وبلىسىنىڭ 18 جاستاعى تۇرعىنى ۇستالدى. كۇدىكتىنىڭ ۋاقىتشا مەكەن-جايىنا ءتىنتۋ جۇرگىزۋ كەزىندە ءتۇرلى ءدىني كىتاپتار، ءدىني ءماتىنى بار بروشيۋرا سەكىلدى ايعاق زاتتار تاركىلەندى. قازىر كۇدىكتىگە قاتىستى قوعامدىق نەمەسە ءدىني بىرلەستىكتىڭ نە وزگە دە ۇيىمنىڭ ەكسترەميزمدى نەمەسە تەرروريزمدى جۇزەگە اسىرۋىنا بايلانىستى ولاردىڭ قىزمەتىنە سوتتىڭ تىيىم سالۋ نەمەسە تاراتۋ تۋرالى شەشىمىنەن كەيىن ولاردىڭ قىزمەتىن ۇيىمداستىرۋ جانە وعان قاتىسۋ دەرەگىمەن قىلمىستىق ءىس قوزعالدى»، - دەپ حابارلادى پوليتسيا دەپارتامەنتىنىڭ باسپا ءسوز قىزمەتى.
ەسكە سالا كەتەلىك، بۇدان بۇرىن الەۋمەتتىك جەلىدە ءدىني مازمۇنداعى سۋرەت جۇكتەگەن اتىراۋ تۇرعىنىنا ايىپپۇل سالىنعانىن حابارلاعان ەدىك.
اۆتور
جولداسبەك شوپەعۇل
