استانالىق عالىمدار كۇرىش قاۋىزى مەن جۇگەرى وزەگىنەن قان قىسىمىن تۇسىرەتىن ءدارى سينتەزدەدى

استانا. KAZINFORM - نازاربايەۆ ۋنيۆەرسيتەتتىڭ (NU - رەد.) پروفەسسورى نۇرشات نۇراجى جەتەكشىلىك ەتەتىن ينجەنەريا جانە تسيفرلىق عىلىمدار مەكتەبىنىڭ عالىمدارى كۇرىش قاۋىزى مەن جۇگەرى وزەگىنەن قان قىسىمىن تومەندەتەتىن دارىلىك زات سينتەزدەپ شىعاردى. اۆتورلار ەندى جوبانى كوممەرتسياعا شىعارۋدىڭ مۇمكىندىكتەرىن ىزدەپ جاتىر.

NU عالىمدارى مۇنايدان وڭدەلەتىن ءدارى-دارمەكتى ءتىرى اعزالاردىڭ قالدىعىنان الۋ جوباسىن قولعا العانىن بۇعان دەيىن دە جازعان ەدىك.

جالپى بيوماسسانى مۇناي ورنىنا وڭدەپ پايدالانۋ يدەياسى الەمدە تالايدان بەرى بار. ا ق ش ەنەرگەتيكا مينيسترىلىگى ادامزات وسىمدىكتەن الىناتىن 12 مولەكۋلانىڭ رەاكسيا تىزبەگىن اشسا، مۇنايعا تاۋەلدىلىكتەن قۇتىلاتىنىن مالىمدەگەن. عالىمدارعا وسى تەوريا كادىمگىدەي قامشى بولىپ وتىر.

قازاقستان عالىمدارى بيوماسسا رەتىندە ءشوپتىڭ، اعاشتىڭ، بالدىردىڭ، مالدىڭ، بالىق پەن قۇستىڭ تىندەرىن، سۇيەكتىڭ، ءجۇن-تەرىنىڭ ءتۇرلى قالدىعىن پايدالانۋدىڭ بىرنەشە جولىن زەرتتەۋ نىسانى ەتىپ العان. ول ءۇشىن قالدىقتىڭ بەلگىلى ءبىر ءتۇرىن رەاكتورعا سالىپ، قىزدىرادى. ودان كەيىن ەرىتىندىمەن ارالاستىرىپ وڭدەيدى. وسى رەاكسيالاردىڭ اسەرىنەن ءبولىنىپ شىققان تسەلليۋلوزا مەن سۇيىقتىقتى تازارتىپ، ارنايى قۇرىلعى كومەگىمەن سىناقتان وتكىزەدى.

اتالعان مەكتەپتىڭ اعا عىلىمي قىزمەتكەرى ميناۆار شايماردان باستاعان بىرنەشە مامان ءدال وسى تاسىلمەن جۇگەرىنىڭ وزەگى مەن كۇرىشتىڭ قاۋىزىن وڭدەپ، قان قىسىمىن رەتتەيتىن ءدارىنىڭ سۋبستانتسياسىن ويلاپ تاپقان. ودان جاسالاتىن ءدارىنىڭ مەديتسيناداعى رەسمي اتاۋى - پرازوزين. بۇل ءدارى نەگىزىنەن قانتامىرلاردى كەڭەيتۋگە، جۇرەك قاعىسى ءالسىز ادامدارعا، قۋىق استى بەزىنىڭ ءزار شىعارۋعا كەدەرگىسىن جەڭىلدەتۋگە، جاراقاتتان كەيىنگى كۇيزەلىستى سەيىلتۋگە قولدانىلادى.

توپ جەتەكشىسى ناقتى ناتيجەگە قول جەتكىزۋ ءۇشىن ءۇش جىل ۋاقىت كەتكەنىن ايتادى.

- جۇگەرى مەن كۇرىشتى تاڭداعانىمىز، بولاردىڭ قۇرامىندا گەميتسەلليۋلوزا بار. وسى گەميتسەلليۋلوزادان باعالى مولەكۋلاعا قاجەت زاتتار كوپ. جۇگەرىنىڭ وزەگىن ۇنتاقتاپ، ارنايى قىشقىلمەن وڭدەپ، باعالى مولەكۋلا الدىق. كۇرىشتىڭ قاۋىزىن دا ءدال وسىلاي حيميالىق جولمەن ىلعالداندىرىپ كوردىك. ەكەۋى دە ءساتتى شىقتى دەۋگە بولادى. بۇدان كەيىن انگليادان ارنايى ساتىپ العان قوندىرعىمەن ءتورت ساتىلى حيميالىق رەاكتسيا ءتۇزىپ، دايىن ءونىم الدىق. ءداستۇرلى ءتاسىل بويىنشا بۇل ءتورت ساتىنىڭ ءار ساتىسىن بولەك- بولەك جاسايتىنبىز. ونىڭ بارىنە ۋاقىت، كۇش-قايرات، قۋات كەرەك بولاتىن. ال مىنا اعىندى تيپتەگى قوندىرعىنىڭ ارقاسىندا دايىن ەكستراكتان قاجەتتى ءونىمدى الاتىن تىزبەك قۇرا الدىق، - دەيدى ميناۆار شايماردان.

قوندىرعىنى جاساپ شىعارعان انگليالىق كومپانيا قازاقستان عالىمدارىنىڭ بۇل جەتىستىگىن LinkedIn-دە جاريالاپتى.

ءدارىنى جاساپ شىعارۋمەن جۇمىس بىتپەيتىنى بەلگىلى. پرەپاراتتىڭ مولەكۋلالىق قۇرىلىمىن دالەلدەۋ ءۇشىن يادرولىق ماگنيتتىك رەزونانستان (NMR - مولەكۋلا ىشىندەگى اتومداردىڭ ورنىن انىقتايتىن «ماگنيتتىك سكانەر») وتكىزگەن. وسىدان كەيىن عانا جۇگەرى وزەگى مەن كۇرىش قاۋىزىنان قان قىسىمىن تۇسىرەتىن ءدارى جاساۋعا بولادى دەيتىن عىلىمي قورىتىندى جاساۋعا مۇمكىندىك العان.

- ەندىگى ساتىدا ءبىز جوبانى فارماكوپيا ستاندارتتارى ارقىلى ءونىمنىڭ تازالىعىن، ۋىتسىز ەكەنىن دالەلدەپ شىعۋىمىز كەرەك. وسىدان كەيىن كوممەرتسيالاندىرۋعا كوشەمىز. ويتكەنى كلينيكالىق سىناقتا وتكىزۋدىڭ قاجەت جوق بولىپ شىقتى. بۇل ءدارىنىڭ باسقا ەكستراكتتان جاسالعان تۇرلەرى مەديتسيناعا بەلگىلى. ەندى سونى جۇگەرى مەن كۇرىش قاۋىزىنان العانىمىزدى دالەلدەسەك جەتىپ جاتىر، - دەيدى عالىم.

دەنساۋلىق ساقتاۋ مينيسترلىگى جوباعا كوممەرتسيالاندىرۋ ساتىسىندا قولداۋ كورسەتۋگە نيەت تانىتىپتى.

بۇل توپ جۇگەرى وزەگى مەن كۇرىش قاۋىزىنان فۋروسەميد اتتى ءدارى دە سينتەزدەپ جاتىر.

- ونى دا سينتەزدەپ بىتىرەيىن دەپ قالدىق. وتكەندە پرەمەر- مينيستر ولجاس بەكتەنوۆ وسى ۋنيۆەرسيتەتكە كەلگەن تاڭداۋلى 87 جوبانىڭ ىشىندە ءبىزدىڭ ەكى جوباعا دا قولداۋ كورسەتۋ كەرەكتىگىن ايتىپ كەتتى. مەملەكەت دەڭگەيىندە قولداۋ بولايىن دەپ تۇر. ولاي بولاتىن ءجونى دە بار. بۇكىل الەمدەگى سياقتى قازاقستاندا دا قان قىسىمىنا شاعىمداناتىن ادام كوپ، - دەيدى ميناۆار شايماردان.

كەيىپكەرىمىز جوعارى ءبىلىمدى قىتاي استاناسى بەيجىڭدە جالپى حيميا ماماندىعىن بويىنشا العان. كەيىن قازاقستانعا قونىس اۋدارىپ، ءال-فارابي اتىنداعى قازاق ۇلتتىق ۋنيۆەرسيتەتىنە ماگيستراتۋراعا تۇسەدى. ال دوكتورلىق دارەجەنى قازاق-بريتان تەحنيكالىق ۋنيۆەرسيتەتىندە قورعاپ شىققان.

استاناداعى ۇلتتىق زەرتحانادا بيوماسسانى مۇناي ورنىنا پايدالانۋ جوباسىنا اتسالىسىپ جۇرگەنىنە ءۇش جىل بولىپتى.