استاناداعى ناۋرىز مەيرامى: 8500 گە جۋىق ادام ۇلتتىق سپورتتان وتكەن جارىستارعا قاتىستى
استانا. KAZINFORM - ناۋرىز مەيرامى اياسىندا استانا قالاسىنىڭ دەنە شىنىقتىرۋ جانە سپورت باسقارماسى مەرەكەلىك سپورتتىق ءىس-شارالار ۇيىمداستىردى. بۇل تۋرالى استانا قالاسى اكىمدىگىنىڭ باسپا ءسوز قىزمەتى حابارلادى.
21-22-ناۋرىز كۇندەرى ەلورداداعى 30 ءتۇرلى الاڭدا ۇلتتىق سپورت تۇرلەرىنەن جارىستار ءوتىپ، قالا تۇرعىندارى مەن قوناقتارىنا ءداستۇرلى ويىنداردى تاماشالاۋعا مۇمكىندىك جاسالدى.
ەكى كۇنگە سوزىلعان سايىستارعا 8500 گە جۋىق ادام قاتىسىپ، ارقان تارتىس، قازاق كۇرەسى، اسىق اتۋ، توعىزقۇمالاق، لاڭگى تەبۋ، قوشقار كوتەرۋ سياقتى ۇلتتىق ويىنداردا باق سىنادى. جەڭىمپازدار ارنايى سىيلىقتارمەن ماراپاتتالدى.
قالالىق سپورتتىق بۇقارالىق ءىس-شارالاردى وتكىزۋ ديرەكتسياسى باسشىسىنىڭ ورىنباسارى ەرجىگىت وسەربايدىڭ ايتۋىنشا، ەلوردا تۇرعىندارى مەن قوناقتارىنىڭ قىزىعۋشىلىعى جوعارى بولدى. اسىرەسە ءداستۇرلى قوي كوتەرۋ سايىسى ەرەكشە تارتىستى ءوتتى.
- ناۋرىز مەيرامىنا وراي وتكىزىلگەن ۇلتتىق سپورت جارىستارى اتا- بابا ءداستۇرىن جاڭعىرتىپ قانا قويماي، سالاۋاتتى ءومىر سالتىن ناسيحاتتاۋعا ۇلەس قوستى. ەكى كۇنگە سوزىلعان سايىسقا تەك استانالىقتار عانا ەمەس، قازاقستاننىڭ باسقا قالالارىنان كەلگەن ازاماتتار دا بەلسەندى قاتىستى. جارىستاردىڭ ەڭ كوپ كورەرمەن جيناعان باسەكەسى - قوشقار كوتەرۋ سايىسى. بۇل جارىسقا ەلىمىزدىڭ ءار وڭىرىنەن كەلگەن قاتىسۋشىلار كۇش سىناسىپ، ەڭ مىقتىلار انىقتالدى، - دەدى ەرجىگىت وسەرباي.
سونىمەن قاتار، قازاق كۇرەسىنەن اشىق تۋرنير ۇيىمداستىرىلىپ، وعان 700 دەن استام سپورتشى قاتىستى. بالۋاندار ءۇش سالماق دارەجەسىندە - 55 كەلىگە دەيىن، 90 كەلىگە دەيىن جانە اۋىر سالماقتا كۇش سىناستى. جەڭىمپازدار باعالى سىيلىقتارعا يە بولدى.
ايتا كەتەلىك 14-ناۋرىزدا باستالعان 10 كۇندىك «ناۋرىزنامانىڭ» سوڭعى كۇنى ۇلتتىق ەكولوگيالىق ناۋقانعا ارنالعان.
