استانادا كىرىستەر دەپارتامەنتى اۋديت ءبولىمى باسشىسىنىڭ ۇيىنەن 129,4 ميلليون تەڭگە تاركىلەندى
استانا. KAZINFORM - استانا قالاسى مەملەكەتتىك كىرىستەر دەپارتامەنتى جاناما سالىقتاردى اكىمشىلەندىرۋ باسقارماسىنىڭ ق ق س (قوسىلعان قۇن سالىعى) اۋديت ءبولىمىنىڭ باسشىسى ۇستالدى.
بۇل تۋرالى سىبايلاس جەمقورلىققا قارسى ءىس-قيمىل اگەنتتىگىندە وتكەن بريفينگىدە ايتىلدى.
«سىبايلاس جەمقورلىققا قارسى قىزمەت جاسىرىن ءىس-شارالاردىڭ ناتيجەلەرى بويىنشا اۋىر جەمقورلىق قىلمىس جاسادى دەگەن كۇدىكپەن استانا قالاسى مەملەكەتتىك كىرىستەر دەپارتامەنتى جاناما سالىقتاردى اكىمشىلەندىرۋ باسقارماسىنىڭ ق ق س (قوسىلعان قۇن سالىعى) اۋديت ءبولىمىنىڭ باسشىسىن ۇستادى. ول 36 ميلليون تەڭگە سوماسىندا ق ق س قايتارۋ بويىنشا وڭ شەشىم قابىلداعانى ءۇشىن كاسىپكەرلىك سۋبەكتىسىنەن 3,6 ميلليون تەڭگە سوماسىندا پارا العان»، - دەدى انتيكوردىڭ رەسمي وكىلى دانيار بيگايداروۆ اگەنتتىكتە وتكەن باسپا ءسوز ءماسليحاتىندا.
ونىڭ ايتۋىنشا، ءتىنتۋ بارىسىندا ونىڭ ۇيىنەن 129,4 ميلليون تەڭگە تاركىلەنىپ، تەكسەرىلىپ جاتىر.
«كۇدىكتى سوتتىڭ سانكسياسىمەن كۇدىكتى 2 اي مەرزىمگە قاماۋعا الىندى. تەرگەۋ جالعاسۋدا»، - دەدى ول.
بۇعان دەيىن جەتىسۋ وبلىسى سارقان اۋدانى ءبىلىم ءبولىمى باس بۋحگالتەرى ءىرى كولەمدە اقشا جىمقىردى دەگەن كۇدىكپەن تەرگەلىپ جاتقانىن حابارلاعان ەدىك.
ايتا كەتسەك، انتيكور سۋ تاسقىنىنىڭ سالدارىن جويۋعا جانە الدىن الۋعا باعىتتالعان بيۋجەت قاراجاتىن ءبولۋ جانە ونىڭ جۇمسالۋ بارىسىنا مونيتورينگ جۇرگىزەدى.
