استانادا كيبەرقىلمىسكەرلەر 28,4 ميلليون تەڭگەنى بەلگىسىز شوتتارعا اۋدارعان

استانا. KAZINFORM - كيبەرقىلمىسقا قارسى ءىس-قيمىل باسقارماسى جۇرگىزگەن جەدەل-ىزدەستىرۋ شارالارى بارىسىندا ءىرى كولەمدەگى الاياقتىق دەرەگى انىقتالدى، دەپ حابارلايدى Polisia.kz.

تەرگەۋ كەزىندە د. ەسىمدى ازاماتتىڭ دەپوزيتتىك ەسەپشوتىنان 28,4 ميلليون تەڭگە بەلگىسىز ادامداردىڭ ەسەپشوتتارىنا زاڭسىز اۋدارىلعانى انىقتالدى.

- بۇل فاكتى بويىنشا ق ر قىلمىستىق كودەكسىنىڭ 190-بابى 4-بولىگى بويىنشا قىلمىستىق ءىس قوزعالدى. جەدەل-ىزدەستىرۋ شارالارى بارىسىندا استانا قالاسىندا ءۇش ادام ۇستالدى. ولاردىڭ ەكەۋى - اقتاۋ قالاسىنىڭ، بىرەۋى - قاراعاندى وبلىسىنىڭ تۇرعىنى. تەرگەۋ ناتيجەسىندە كۇدىكتىلەردىڭ ەسەپشوتىنا جابىرلەنۋشىنىڭ اقشاسى تۇسكەنى بەلگىلى بولدى. قىلمىستى ۇيىمداستىردى دەگەن كۇدىككە ىلىنگەن اقتاۋ قالاسىنىڭ تۇرعىنى جاسىرىنىپ جۇرگەن جەرىنەن ۇستالىپ، ۋاقىتشا ۇستاۋ يزولياتورىنا قامالدى، - دەلىنگەن ۆەدومستۆو حابارلاماسىندا.

ءى ءى م مالىمەتىنشە، قازىر تەرگەۋ جالعاسىپ جاتىر.

بۇدان بۇرىن بىرنەشە وبلىستا قاڭتار وقيعاسى كەزىندە ۇرلانعان قارۋ- جاراقتار تابىلعانىن جازدىق.

اۆتور

اينۇر تۋماكبايەۆا