استانادا ەكى اۋداننىڭ اكىمى تاعايىندالدى
استانا. KAZINFORM - استانادا سارايشىق مەن الماتى اۋدانداندارىنىڭ اكىمدەرى تاعايىندالدى. بۇل تۋرالى قالا اكىمدىگىنىڭ باسپا ءسوز قىزمەتى ءمالىم ەتتى.
ق ر پرەزيدەنتى اكىمشىلىگىنىڭ جانە قالالىق ءماسليحات دەپۋتاتتارىنىڭ كەلىسىمى بويىنشا 39 جاستاعى ماقسات سامات ۇلى سارايشىق اۋدانىنىڭ اكىمى بولىپ تاعايىندالدى. تاعايىندالعانعا دەيىن الماتى اۋدانىنىڭ اكىمى قىزمەتىن اتقاردى.
ول ەڭبەك جولىن 2007 -جىلى الماتى قالاسى تابيعي رەسۋرستار جانە تابيعات پايدالانۋدى رەتتەۋ دەپارتامەنتىنىڭ مامانى قىزمەتىنەن باستاعان. ءار جىلدارى «استانا قالالىق كوممۋنالدىق شارۋاشىلىق»، استانا قالاسىنىڭ ەنەرگەتيكا جانە كوممۋنالدىق شارۋاشىلىق دەپارتامەنتىندە جانە ت. ب. جۇمىس ىستەدى.
2012 -جىلدان باستاپ 2019 -جىلدىڭ مامىرىنا دەيىن الماتى اۋدانى اكىمىنىڭ اپپاراتىندا ءتۇرلى لاۋازىمداردا بولدى. 2019 -جىلدىڭ مامىرىنان 2022 -جىلدىڭ تامىزىنا دەيىن الماتى اۋدانى اكىمىنىڭ ورىنباسارى، بايقوڭىر اۋدانى اكىمىنىڭ ورىنباسارى قىزمەتتەرىن اتقاردى.
2022 -جىلدىڭ تامىز ايىنان باستاپ الماتى اۋدانىنىڭ اكىمى لاۋازىمىندا جۇمىس ىستەدى.
مەملەكەت باسشىسىنىڭ تاپسىرماسى اياسىندا سارايشىق اۋدانى اكىمىنە اۋدان مەن تۇرعىن الاپتاردى دامىتۋ بويىنشا ءبىرقاتار مىندەت جۇكتەلدى.
ال، ق ر پرەزيدەنتى اكىمشىلىگىنىڭ جانە قالالىق ءماسليحات دەپۋتاتتارىنىڭ كەلىسىمى بويىنشا 39 جاستاعى رۋستام تاۋەكەلوۆ الماتى اۋدانىنىڭ اكىمى بولىپ تاعايىندالدى. ول وسىعان دەيىن «ەلوردا قۇرىلىس كومپانياسى» ج ش س باسشىسى قىزمەتىن اتقارعان.
ەڭبەك جولىن ق ر ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىندە باستاعان. ءار جىلدارى «بالكانتاۋ KZ» ج ش س باسشىسى، «ەلوردا قۇرىلىس كومپانياسى» ج ش س ديرەكتورىنىڭ ورىنباسارى، «City Transportation Systems» ج ش س باسقارما ءتوراعاسىنىڭ ورىنباسارى بولىپ جۇمىس ىستەگەن.
2022 -جىلدىڭ قازان ايىنان باستاپ «ەلوردا قۇرىلىس كومپانياسى» ج ش س باسشىسى قىزمەتىن اتقاردى.
مەملەكەت باسشىسىنىڭ تاپسىرمالارى اياسىندا الماتى اۋدانى اكىمىنىڭ الدىنا اۋدان مەن تۇرعىن الاپتاردى دامىتۋ بويىنشا ءبىرقاتار مىندەت قويىلدى.
اۆتور
باقىتگۇل اباي قىزى
