استانادا كوپقاباتتى تۇرعىن ۇيدەن ءورت شىعىپ، ءۇش بالا قازا تاپتى

حابارلاما تۇسكەننەن كەيىن توتەنشە جاعدايلار مينيسترلىگىنىڭ كۇشتەرى مەن قۇرالدارى وقيعا ورنىنا جەدەل جەتتى. العاشقى بولىمشەلەر كەلگەن ساتتە پاتەردە اشىق جالىن بولعانى انىقتالدى.

ءورتتى ءسوندىرۋ بارىسىندا جانىپ جاتقان پاتەردەن كۇيىك العان ايەل قۇتقارىلىپ، جەدەل مەديتسينالىق جاردەم بريگاداسىنا تاپسىرىلعان. زارداپ شەككەن تۇرعىن №1 كوپسالالى قالالىق اۋرۋحاناعا جاتقىزىلدى.

- وقيعا ورنىنان ءۇش كامەلەتكە تولماعان بالانىڭ دەنەسى تابىلدى. ت ج م كۇشتەرى جوعارى قاباتتاردان 20 ادامدى ەۆاكۋاتسيالادى. سونىمەن قاتار 40-قا جۋىق تۇرعىن عيماراتتان ءوز بەتىنشە شىعىپ ۇلگەرگەن، - دەلىنگەن مينيسترلىكتىڭ اقپاراتىندا.

ءورت تولىقتاي ءسوندىرىلدى. قازىرگى ۋاقىتتا ءورتتىڭ شىعۋ سەبەپتەرى انىقتالىپ جاتىر.

اكىمدىك مالىمەتىنشە، زارداپ شەككەن ايەلگە جانە قازا تاپقانداردىڭ وتباسىنا قاجەتتى جان-جاقتى كومەك كورسەتىلەدى. جاعداي باقىلاۋعا الىنعان.

ەسكە سالا كەتەيىك، بۇعان دەيىن ساتبايەۆ قالاسىندا ورتتەن ەر ادام مەن ءتورت بالا قۇتقارىلدى.