استانا ورتالىق ەۋرازيانىڭ جاۋھارى، زاماناۋي قازاقستاننىڭ كەلبەتى - پرەزيدەنت
استانا. KAZINFORM - قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ قازاقستاندىقتاردى استانا كۇنىمەن قۇتتىقتادى.
قۇرمەتتى وتانداستار!
استانا كۇنى قۇتتى بولسىن!
بيىل بۇل مەرەكە دومبىرا كۇنىمەن تۇسپا-تۇس كەلىپ وتىر. مۇنىڭ سيمۆولدىق ءمانى زور. قازاقتىڭ قاسيەتتى قارا دومبىراسى ۇلى دالانىڭ مىڭجىلدىق بىرەگەي مادەني مۇراسىن ايگىلەيدى. ال ەلوردامىز قازاقستاننىڭ تۇراقتى ءارى قارقىندى ءوسىپ-وركەندەۋىن جانە جاسامپاز ۇلتتىڭ جارقىن بولاشاققا ۇمتىلىسىن ايشىقتاي تۇسەدى.
بۇگىندە استانا - ەلىمىزدىڭ قوعامدىق، ساياسي جانە ىسكەرلىك ورداسى. ءدال وسى جەردە حالقىمىزدىڭ بولاشاعىنا قاتىستى ماڭىزدى شەشىمدەر قابىلدانادى، وزىق يدەيالار ىسكە اسىرىلىپ، بيىك ماقساتتار ورىندالادى. مۇندا ءبىلىمپازدىق پەن ەڭبەكقورلىق قۇندىلىقتارى بەرىك ورنىعىپ، جۇرتىمىزدىڭ ىنتىماعى مەن كەلىسىمى نىعايا بەرەدى.
استانا ورتالىق ەۋرازيانىڭ جاۋھارى، زاماناۋي قازاقستاننىڭ كەلبەتى سانالادى. حالىقارالىق قاۋىمداستىق باس قالامىزدى بىتىمگەرشىلىك باستامالاردى جۇزەگە اسىرىپ، جاھاندىق ديالوگ ورناتۋ ىسىندە ەرەكشە ءرول اتقاراتىن بەيبىتشىلىك شاھارى رەتىندە بىلەدى.
ەلوردامىز ءاردايىم تۇبەگەيلى وزگەرىستەر مەن اۋقىمدى رەفورمالاردىڭ باستاۋىندا تۇرادى. الداعى ۋاقىتتا دا استانامىز ادىلەتتى، تازا جانە قۋاتتى قازاقستاندى قۇرۋ جولىنداعى جالپىۇلتتىق جاڭعىرۋ جۇمىستارىنا ۇيىتقى بولا بەرەدى دەپ سەنەمىن.
سۇيىكتى قالامىز وركەندەپ، گۇلدەنە بەرسىن!
بارشاڭىزعا زور دەنساۋلىق، باق-بەرەكە تىلەيمىن!
