استانا مەن پاريج مادەني سالاداعى سەرىكتەستىكتى جاڭا باعىتتارمەن تولىقتىردى
استانا. KAZINFORM - قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالايەۆا فرانسۋز رەسپۋبليكاسىنىڭ مادەنيەت ءمينيسترى راشيدا داتيمەن كەزدەستى. كەزدەسۋ قازاقستاندىق دەلەگاتسيانىڭ فرانسياعا جۇمىس ساپارى اياسىندا ءوتتى.
تاراپتار ەكىجاقتى مادەني ىنتىماقتاستىقتىڭ قازىرگى جاعدايى مەن بولاشاعىن تالقىلادى. مينيسترلەر قازاقستان مەن فرانسيا اراسىنداعى مادەني-گۋمانيتارلىق بايلانىستاردىڭ قارقىندى دامىپ كەلە جاتقانىن اتاپ ءوتىپ، مەملەكەت باسشىلارىنىڭ ەكى ەلگە ساپارى ىنتىماقتاستىقتى جانداندىرۋعا سەرپىن بەرگەنىن ەرەكشە اتاپ كورسەتتى.
ايدا بالايەۆا مۋزەي ءىسى، ارحەولوگيا جانە تاريحي-مادەني مۇرانى ساقتاۋ سياقتى باعىتتاردا تاجىريبە الماسۋدى دامىتۋدىڭ ماڭىزىن اتاپ ءوتتى. سونداي-اق ول عىلىمي-زەرتتەۋ سالاسىنداعى ىنتىماقتاستىقتى كەڭەيتۋدى، قازاقستاندىق مامانداردى فرانسيانىڭ جەتەكشى مادەني مەكەمەلەرىندە تاعىلىمدامادان وتكىزۋدى، سونىمەن قاتار بىرلەسىپ كينووندىرۋ، مۋلتيپليكاتسيا جانە بالالار كونتەنتىن دامىتۋدى ۇسىندى.
ەكى ەل مادەنيەت سالاسىنىڭ تەحنيكالىق باعىتتارىنداعى مامانداردىڭ بىلىكتىلىگىن ارتتىرۋ جانە وقىتۋ بويىنشا ىنتىماقتاسۋعا كەلىستى. اسىرەسە، دىبىس رەجيسسەرلەرى، جارىق سۋرەتشىلەرى، تەحنولوگ-سۋرەتشىلەر، بەينەينجەنەرلەر، ساحنا ماشينيستەرى، ساحنالىق كوستيۋمدەر سۋرەتشىلەرى، بۋتافور-دەكوراتورلار، گريمەر- پوستيجەرلەر جانە باسقا دا تاپشى ماماندىقتار بويىنشا كادرلار دايارلاۋعا ەرەكشە نازار اۋدارىلاتىن بولادى.
ءوز كەزەگىندە راشيدا داتي قازاقستاننىڭ مادەني مۇرانى ساقتاۋ ىسىندەگى جۇمىسىن وڭ باعالاپ، ەكى ەلدىڭ سالالىق مەكەمەلەرى اراسىنداعى تاجىريبەلىك ىنتىماقتاستىقتى كەڭەيتۋگە دايىن ەكەنىن ءبىلدىردى.
كەزدەسۋ قارساڭىندا پاريجدەگى يۋنەسكو شتاب-پاتەرىندە وتاندىق ۇلى كومپوزيتور ءارى ديريجەر نۇرعيسا تىلەنديەۆتىڭ 100 جىلدىعىنا ارنالعان مەرەكەلىك كونتسەرت ءوتتى. ءىس-شارا شەتەلدىك كورەرمەنگە قازاقستاننىڭ باي مادەني مۇراسىمەن جاقىنىراق تانىسۋىنا مۇمكىندىك بەردى. كونسەرت جەرگىلىكتى تۇرعىنداردىڭ كوڭىلىنەن شىقتى.
ايتا كەتەيىك، كەشە ايدا بالايەۆا «ءۇستىرت» نىسانىنىڭ قۇجاتتاماسىن يۋنەسكوعا تاپسىردى.
