استانادا ەكولوگيالىق ستاندارتقا ساي ەمەس جۇك كولىكتەرىن ەلگە زاڭسىز اكەلگەن قىلمىستىق توپ اشكەرەلەندى

تەرگەۋ بارىسىندا ءبىر توپ تۇلعانىڭ ءوز باقىلاۋىنداعى جاۋاپكەرشىلىگى شەكتەۋلى سەرىكتەستىكتەر (ج ش س) ارقىلى قازاقستانعا «ەۆرو-2» ەكولوگيالىق كلاسىنا جاتاتىن FAW ماركالى جۇك كولىكتەرىن زاڭسىز اكەلۋدى ۇيىمداستىرعانى انىقتالدى. بۇل ارەكەتتەر ەلدە «ەۆرو-4» ستاندارتىنان تومەن تەحنيكانى يمپورتتاۋعا زاڭمەن تىيىم سالىنعانىنا قاراماستان جاسالعان.

ارنايى تەحنيكا قىتاي حالىق رەسپۋبليكاسىنان سىرتقى ەكونوميكالىق كەلىسىمشارتتار نەگىزىندە جەتكىزىلىپ، كەدەندىك راسىمدەۋدەن وتكىزۋ كەزىندە جالعان مالىمەتتەر پايدالانىلعان. كۇدىكتىلەر كولىك قۇرالدارىنىڭ قاۋىپسىزدىك سەرتيفيكاتتارىن (س ب ك س) قولدان جاساپ، قۇجاتتارعا اۋىر جۇك كولىكتەرىنىڭ ەكولوگيالىق كلاسى جوعارى «ەۆرو-5» ستاندارتىنا ساي دەگەن جالعان اقپارات ەنگىزگەن.

وسى قىلمىستىق سحەمانىڭ ناتيجەسىندە قازاقستانعا جالپى كەدەندىك قۇنى 284 ميلليون تەڭگەدەن اساتىن 20 بىرلىك ارنايى تەحنيكا زاڭسىز كىرگىزىلگەن. كەيىننەن بۇل كولىكتەر ءوزارا بايلانىسى بار كومپانيالار جەلىسى ارقىلى قايتا ساتىلىپ، مەملەكەتتىك ساتىپ الۋ كەلىسىمشارتتارى اياسىندا مەكەمەلەرگە 600 ميلليون تەڭگەدەن استام سوماعا جەتكىزىلگەن.

قازىرگى تاڭدا سوت سانكسياسىمەن كۇدىكتىلەرگە تيەسىلى 9 اۆتوكولىك پەن ءبىر پاتەر حاتتالدى. كىلمىستىق توپتىڭ ءبىر مۇشەسى قاماۋعا الىندى، ال ونىڭ ەكى سىبايلاسىنا قاتىستى ەشقايدا كەتپەۋ تۋرالى بۇلتارتپاۋ شاراسى قولدانىلدى. قىلمىستىق- پروتسەستىك كودەكستىڭ 201-بابىنا سايكەس، تەرگەۋدىڭ وزگە مالىمەتتەرى جاريا ەتۋگە جاتپايدى.

ايتا كەتۋ كەرەك، ەكولوگيالىق تالاپتارعا سايكەس كەلمەيتىن تەحنيكالاردى پايدالانۋ قورشاعان ورتاعا ەلەۋلى نۇقسان كەلتىرەدى. «ەۆرو-2» كلاسىنداعى جۇك كولىكتەرى زاماناۋي «ەۆرو-4» جانە «ەۆرو-5» ستاندارتتارىمەن سالىستىرعاندا اتموسفەراعا زياندى زاتتاردى ەسەلەپ كوپ بولەدى، بۇل اۋا ساپاسىنىڭ ناشارلاۋىنا جانە تۇرعىندار دەنساۋلىعىنا تىكەلەي قاۋىپ توندىرەدى.

وسىعان دەيىن كولىك مينيسترلىگى استانادا جۇك كولىكتەرىنە باقىلاۋدى كۇشەيتكەنىن جازعان ەدىك.