اسكەري وقۋ ورىندارىنا eGov.kz پورتالى ارقىلى ءوتىنىم قابىلدايدى

استانا. KAZINFORM - ەندى قازاقستاندىق اسكەري جوعارى وقۋ ورىندارى وقۋعا ءوتىنىمدى eGov.kz پورتالى ارقىلى قابىلدايدى. بۇل تۋرالى «ۇلتتىق اقپاراتتىق تەحنولوگيالار» ا ق باسپا ءسوز قىزمەتى حابارلادى.

eGov.kz پورتالىندا قورعانىس مينيسترلىگىنىڭ اسكەري وقۋ ورىندارىنا تالاپكەرلەرگە وقۋعا تۇسۋگە ءوتىنىش بەرۋ قىزمەتى قولجەتىمدى.

- جۇيە الدىمەن بارلىق جەكە دەرەكتى (مەديتسينالىق دەرەكتەر، سوزىلمالى اۋرۋلار جانە الىنعان ينفەكسيالار) تەكسەرەدى، سونداي-اق سوتتالماعانىن تەكسەرۋ سۇرانىسىن جىبەرەدى. ەگەر ادام سوتتالماعان بولسا، جاۋاپ 10 مينۋتتىڭ ىشىندە كەلەدى. سودان كەيىن ۇلتتىق قاۋىپسىزدىك كوميتەتى تاراپىنان ارنايى تەكسەرۋدەن ءوتۋ ءۇشىن ساۋالنامانى تولتىرۋ قاجەت. ۇلتتىق قاۋىپسىزدىك كوميتەتى تەكسەرۋ ءۇشىن 075-نىساندى انىقتامانى الدىن الا الۋ جانە ءومىربايانىن دايىنداۋ ۇسىنىلادى، - دەلىنگەن حابارلامادا.

كوپتەگەن دەرەك (مەكەنجاي، فوتوسۋرەت، جاقىندارى تۋرالى مالىمەتتەر) مەملەكەتتىك جۇيەلەردەن اۆتوماتتى تۇردە جۇكتەلەدى، قالعانىن قولمەن قوسۋعا بولادى.

ءوتىنىش بەرۋ ءۇشىن:

1. eGov.kz پورتالىندا تىركەلىپ، «ازاماتتارعا» - «اسكەري ەسەپكە الۋ جانە قاۋىپسىزدىك» - «اسكەري قىزمەت» بولىمىنە ءوتىڭىز.

2. «قورعانىس مينيسترلىگى اسكەري وقۋ ورىندارىنا كانديداتتاردى قابىلداۋ» قىزمەتىن تاڭداپ، «قىزمەتكە ونلاين تاپسىرىس بەرۋ» تۇيمەسىن باسىڭىز.

3. قاجەتتى دەرەكتەردى تولتىرىپ، وتىنىشكە قول قويىڭىز.

4. ناتيجە جەكە كابينەتتە «قىزمەت تاريحى» بولىمىندە قولجەتىمدى بولادى.

ۇشقىش ماماندىعى ءۇشىن كۋالاندىرۋعا دەيىن 30 كۇننەن كەشىكتىرمەي الىنعان مەديتسينالىق قورىتىندى تالاپ ەتىلەدى. قورىتىندى (ونىڭ سەبەبىن كورسەتە وتىرىپ قابىلداۋ نەمەسە قابىلداۋدان باس تارتۋ) جەكە كابينەتكە كەلەدى. قىزمەت مەرزىمى - 200 كۇنگە دەيىن. قۇجاتتىڭ تولىق ءتىزىمى جانە ەگجەي-تەگجەيلى نۇسقاۋلىق - eGov.kz سايتىندا.

ايتا كەتەيىك، eGov Mobile ارقىلى قازاقستاندىقتار جەكە دەرەكتەرىنىڭ تارالۋ جاعدايىن تەكسەرە الادى.

سونداي-اق eGov پورتالىنىڭ كومەگىمەن زاڭسىز تىركەلگەن SIM- كارتانى انىقتاۋ مۇمكىندىگى بار.