اسكەري دايىندىق ءپانىنىڭ اتاۋى وزگەرىپ، مازمۇنى جاڭارادى

ۆيتسە-ءمينيستردىڭ ايتۋىنشا، قازىرگى تاڭدا ءپان اتاۋىن «العاشقى اسكەري دايىندىق» دەپ وزگەرتۋگە قاتىستى تۇزەتۋلەر ازىرلەنىپ جاتىر. ءتيىستى بۇيرىق جوباسى ادىلەت مينيسترلىگىنىڭ قاراۋىندا بولادى.

- قۇجات قابىلدانعاننان كەيىن وقۋ باعدارلامالارى مەن جوسپارلارى قايتا قارالادى. وقۋلىقتار جاڭارتىلىپ، ساراپتامادان جانە اپروباتسيادان وتەدى. بۇل جۇمىستاردى تولىق ىسكە اسىرۋعا شامامەن 1,5 جىل ۋاقىت قاجەت، - دەدى ول.

وسىعان سايكەس ءپان 2028-2029 وقۋ جىلىنان باستاپ جاڭا اتاۋمەن وقىتىلادى.

ۆيتسە-مينيستر اسكەري دايىندىق ءپانىنىڭ قازىرگى جاي-كۇيىنە توقتالدى.

- بۇگىندە ەلىمىزدەگى 6 مىڭعا جۋىق مەكتەپ پەن 700 دەن استام كوللەدجدە «العاشقى اسكەري-تەحنولوگيالىق دايىندىق» ءپانى وقىتىلادى. ءپان بويىنشا 98 ساعات وقۋ جۇكتەمەسى قاراستىرىلعان، - دەدى شىنار اقپاروۆا.

ونىڭ ايتۋىنشا، وقۋ-دالا جيىندارىن ۇيىمداستىرۋدا وڭىرلەر اراسىندا ايىرماشىلىق بار.

- جيىنداردى اسكەري بولىمدەر بازاسىندا وتكىزۋ ماڭىزدى. الايدا بۇل جۇمىس بارلىق وڭىردە بىردەي دەڭگەيدە جۇرگىزىلمەيدى. بۇعان قارجىلاندىرۋدىڭ جەتكىلىكسىزدىگى، اسكەري بولىمدەردىڭ جەتىسپەۋى جانە ينفراقۇرىلىمنىڭ دايىن بولماۋى اسەر ەتىپ وتىر، - دەدى ۆيتسە-مينيستر.

ايتا كەتەيىك، بۇعان دەيىن مەملەكەت باسشىسى اسكەري-پاتريوتتىق تاربيە جۇيەسىن جەتىلدىرۋگە باعىتتالعان زاڭعا قول قويعان بولاتىن.