اسكەردەگى الىمجەتتىك: پرەزيدەنت ۇلتتىق ۇلان ساربازىنا قاتىستى وقيعانى باقىلاۋىنا الدى
استانا. KAZINFORM – ق ر پرەزيدەنتىنىڭ كەڭەسشىسى - پرەزيدەنتتىڭ باسپا ءسوز حاتشىسى بەرىك ءۋالي مەملەكەت باسشىسىنىڭ اسكەردەگى الىمجەتتىككە قاتىستى ىشكى ىستەر مينيسترىنە شۇعىل تاپسىرما جۇكتەگەنىن مالىمدەدى.
جازباعا قاراعاندا، پرەزيدەنت بەلگىسىز ادامداردىڭ ۇلتتىق ۇلان ساربازىن پويىز تامبۋرىندا ۇرعانى تاسپالانعان بەينەماتەريالمەن تانىسىپ شىققان.
«مەملەكەت باسشىسى ىشكى ىستەر ءمينيسترى ەرجان سادەنوۆكە قاسكويلەردى ۇستاپ، زاڭناماعا سايكەس جاۋاپقا تارتۋ ءۇشىن شۇعىل شارالار قابىلداۋدى تاپسىردى. اسكەردەگى جانە باسقا دا كۇشتىك ۇيىمدارداعى زورلىق-زومبىلىقتىڭ بارلىق فاكتىسى پرەزيدەنتكە باياندالادى. مۇنداي جاعدايلار باقىلاۋعا الىنادى»، - دەلىنگەن جەلىدەگى اقپاراتتا.
بەرىك ءۋالي قاسىم-جومارت توقايەۆتىڭ بيىلعى 2-قىركۇيەكتەگى جولداۋىندا جاس ساربازداردىڭ دەنساۋلىعى مەن ابىروي-بەدەلىنە قول سۇعۋعا جول بەرمەۋ قاجەت ەكەنىنە نازار اۋدارعانىن ەسكە سالادى. وندا پرەزيدەنت بۇل ماسەلەگە اسكەري قۇرىلىمداردىڭ باسشىلارى تىكەلەي جاۋاپتى ەكەنىن ايتقان بولاتىن.
