«اسا ءمان بەرۋدىڭ قاجەتى جوق» - اشىمبايەۆ نازاربايەۆتىڭ ماسكەۋگە ساپارى تۋرالى
استانا. KAZINFORM - بۇگىن سەنات دالىزىندە ماۋلەن اشىمبايەۆ ەكس-پرەزيدەنت نۇرسۇلتان نازاربايەۆتىڭ ماسكەۋگە ساپارىنا قاتىستى پىكىر ءبىلدىردى.
ماۋلەن اشىمبايەۆ ساپار جەكە سيپاتتا بولعانىن جانە ونىڭ رەسمي مارتەبەسى جوق ەكەنىن ايتتى.
«ەكس-پرەزيدەنتتەردىڭ باسقا ەلدەردىڭ ساياساتكەرلەرىمەن كەزدەسۋگە قۇقىعى بار. مۇنىڭ ءبارى جەكە ءىس-شارالار اياسىندا ءوتتى»، - دەپ ءتۇسىندىردى سەنات سپيكەرى.
ماۋلەن اشىمبايەۆ مۇنداي جەكە كەزدەسۋلەرگە ۇلكەن ءمان بەرمەۋگە شاقىردى.
«مەملەكەتتىك ساياسات، ەلىمىزدىڭ سىرتقى ساياسي ستراتەگياسىنا قاتىستى ماسەلەلەردى مەملەكەت باسشىسى قاسىم-جومارت كەمەل ۇلى توقايەۆ جۇزەگە اسىرادى»، - دەدى ول.
ەسكە سالايىق، بۇعان دەيىن قازاقستاننىڭ تۇڭعىش پرەزيدەنتىنىڭ كەڭەسشىسى - باسپا ءسوز حاتشىسى ايدوس ۇكىباي نۇرسۇلتان نازاربايەۆتىڭ شەتەلگە ساپارىنا قاتىستى پىكىر ءبىلدىردى.
