پاريجدە قازاقستاندىق اسپاز ءوز قولىنان شىققان تاعامداردى ۇسىنادى
استانا. KAZINFORM - پاريجدەگى بەدەلدى رەيتينگكە يە «Frederic Simonin» مەيرامحاناسىندا قازاقستاندىق شەف اسپاز ارتەم كانسيەۆتىڭ قولىمەن دايىندالعان تۇسكى اس ۇسىنىلادى.
بۇل تۋرالى Kazinform-نىڭ مەنشىكتى ءتىلشىسى حابارلايدى.
بۇل ءىس- شارا قوناقتارى ەكى اسپاز ءبىر ۋاقىتتا دايىنداعان تاعامداردان اۋىز تيەدى. اسپازشىلار - فرەدەريك سيمونين مەن ارتەم كانتسيەۆ.
فرەدەريك سيمونين الەۋمەتتىك جانە ەكولوگيالىق گاسترونوميانى ناسيحاتتاي وتىرىپ، حالىقارالىق ساحنادا فرانسۋز تاعامدارىن تانىتىپ جۇرگەن اسپاز. ول - 2020 -جىلى فرانسۋز ۇلتتىق اسپازدىق اكادەمياسىنىڭ ادەبي سىيلىعىن جەڭىپ العان جانە «ادال اسپازدىڭ اس ءۇيى» كىتابىنىڭ اۆتورى.
ارتەم كانسيەۆ قازاقستانعا تانىمال. ول ءوز جۇمىسىندا زاماناۋي تەحنولوگيالاردى، ترەندتەردى، قازاقستان ايماقتارىنداعى ءداستۇرلى جانە جەرگىلىكتى ونىمدەردى بىرىكتىرىپ، ءوز كليەنتتەرىنە ەرەكشە گاسترونوميالىق تاجىريبەسىن ۇسىنىپ، قازاق تاعامدارىن جاڭا قىرىنان تانىستىرادى.
«قازاقستان پرەزيدەنتى قاسىم-جومارت توقايەۆتىڭ وسى ايدىڭ باسىندا پاريجگە جاساعان ساپارىنان كەيىن قازاقستان مەن فرانسيا اراسىنداعى قارىم-قاتىناستى ودان ءارى نىعايتۋ ماقساتىندا، فرانسياداعى «Qazelles» قازاق ايەلدەر قاۋىمداستىعى گاسترونوميالىق ديپلوماتيا جوباسىن قولعا الدى. بۇل بىرەگەي جوبا - «ميشلەن» جۇلدىزىنا يە مەيرامحانامەن بىرلەسىپ جۇزەگە اسىرىلۋدا. بۇل قازاقستاننىڭ قوناقجايلىلىق يندۋسترياسى ءۇشىن ۇلكەن قادام بولماق. جوبا اياسىندا ەكى ەلدىڭ مادەنيەتى جاقىنداسىپ، بولاشاقتا فرانسيانىڭ ۇزدىك مەيرامحانالارىمەن تىعىز ىنتىماقتاستىق ورناتىلادى دەپ ۇمىتتەنەمىز.» - دەدى فرانسياداعى قازاق ايەلدەرى قاۋىمداستىعىنىڭ پرەزيدەنتى لاريسا يندجۋدجيان.
ايتا كەتسەك، پاريج تەك فرانسيانىڭ ەمەس، بۇكىل ەۋروپانىڭ اسپازدىق ورتالىعى سانالادى. گۋرماندار بۇل قالاعا الەمنىڭ ءار تۇكپىرىنەن ارنايى كەلەدى. كەيبىر عاسىرلار بويعى تاريحى بار مەيرامحانالاردا اسپازدىق ونەر بيىك دارەجەدە، ال تاعامدارى ونەر تۋىندىلارىنا اينالعان.
اۆتور
ەركەجان سماعۇلوۆا
