پاريج-2024: 29-شىلدەدە قازاقستاندىقتار قانداي ناتيجە كورسەتتى
استانا. KAZINFORM - پاريج وليمپياداسىندا 29-شىلدەدە قازاقستاندىقتار سپورتتىڭ بىرنەشە تۇرىنەن سىنعا ءتۇستى. ولاردىڭ اراسىنان ەشكىم جۇلدەلى ورىندارعا قول جەتكىزە المادى.
پنيەۆماتيكالىق ۆينتوۆكامەن 10 مەتردەن نىسانا كوزدەۋدىڭ فينالىندا الەكساندرا لە التىنشى ورىنعا تۇراقتاپ، 165.4 ۇپاي جينادى.
پنيەۆماتيكالىق تاپانشامەن 10 مەتردەن نىسانا كوزدەۋدە قازاقستان قۇراماسى 11-ساتىدان كورىندى. ولار ىرىكتەۋدە 575 ۇپاي جينادى.
ال سەمسەرلەسۋشى ايگەرىم سارىباي وليمپيادانىڭ 1/16 كەزەڭىندە فرانسيالىق مانون بريۋنەدەن 12:15 ەسەبىمەن جەڭىلىپ قالدى. قارسىلاسى توكيو وليمپياداسىنىڭ كۇمىس جانە قولا جۇلدەگەرى بولعان جانە الەم چەمپيونى اتانعان تاجىريبەلى سپورتشى ەدى.
ساداق اتۋدان كوماندالىق سىندا ەل قۇراماسى 1/8-اينالىمدا يتالياعا 4:5 ەسەبىمەن جول بەردى.
اكادەميالىق ەسكەك ەسۋدە ۆلاديسلاۆ ياكوۆليەۆ پاريج وليمپياداسىندا E/F1 توبىنىڭ جارتىلاي فينالىندا مارەگە ءبىرىنشى جەتتى. ول جارىس جولىن 7 مينۋت 26.20 سەكۋندتا باعىندىردى.
دزيۋدوشى دانيار شامشايەۆ (73 كەلى) العاشقى بەلدەسۋىندە حاڭجوۋداعى جازعى ازيا ويىندارىنىڭ جەڭىمپازى، الەم چەمپيوناتىنىڭ قولا جۇلدەگەرى وزبەكستاندىق مۋرودجون يۋلدوشيەۆقا ەسە جىبەردى.
ايەلدەر اراسىندا 100 مەترگە شالقالاي جۇزۋدە كسەنيا يگناتوۆا ءوز توبىندا مارەگە ەكىنشى بولىپ جەتتى. ۋاقىت كورسەتكىشى - 1:02.51 سەكۋند. الايدا جالپى ەسەپتە 26-ورىننان كورىنىپ، جارتىلاي فينالعا شىعا المادى.
تەننيستەن ەرلەر اراسىنداعى جۇپتىق باسەكەدە الەكساندر بۋبليك پەن الەكساندر نەدوۆەسوۆ العاشقى اينالىمدا برازيليالىق تياگو مونتەيرو مەن تياگو سەيبوت ۋايلدتەن ەكى سەتتە 4:6، 4:6 ەسەبىمەن جەڭىلىپ قالدى.
بادمينتونشى دميتري پانارين ەكىنشى ماتچتا برايان يانگتەن جەڭىلىپ، توپتىق كەزەڭنەن شىعا المادى. كانادالىق سپورتشى 0:2 (18:21، 10:21) ەسەبىمەن جەڭىسكە جەتتى.
ۇستەل تەننيسىنەن ۇلتتىق قۇراما كوشباسشىسى كيريلل گەراسيمەنكو پاريج وليمپياداسىنىڭ 1/16-اينالىمىندا دان سيۋدان باسىم ءتۇستى.
ۇلتتىق قۇرامانىڭ ەڭ جاس سپورتشىسى مۇحامەدسابىر بازارباي ۇلى 1/8 فينالدا حاڭجوۋداعى جازعى ازيا ويىندارىنىڭ كۇمىس جۇلدەگەرى چۋ ەن لايدان 3:2 ەسەبىمەن باسىم ءتۇستى.
ال قامشىبەك قوڭقابايەۆ يسپان بوكسشىسى ايۋب گادفا دريسسيدەن جەڭىلىپ، پاريج وليمپياداسىنىڭ شيرەك فينالىنا شىعا المادى.
وليمپيادانىڭ ءۇشىنشى جارىس كۇنىنەن كەيىن قازاقستان قۇراماسىنىڭ قورجىنىندا 1 التىن، 2 قولا جۇلدە بار.
اۆتور
ءادىلجان ۇمبەت
