پرەزيدەنت ايتقان ارنايى قور اسكەري باعىتتاعى عىلىمي ىزدەنىستەردى دە قارجىلاندىرۋى كەرەك - ساراپشى
«اسكەري- ستراتەگيالىق زەرتتەۋلەر ورتالىعى» اكسيونەرلىك قوعامىنىڭ ۆيتسە- پرەزيدەنتى نياز بەلگىبەكوۆ مەملەكەت باسشىسىنىڭ جولداۋى تۋرالى وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«پرەزيدەنت جولداۋىندا ايتقان ارنايى قوردى قۇرۋعا تالپىنىس باستالعالى 3 جىلدان استى. ءبىراق ءالى كۇنگە دەيىن قارجىلاندىرۋ كوزىنە بايلانىستى ماسەلەنىڭ باسى اشىق تۇر. ول قوردىڭ ماڭىزى وتە زور. ويتكەنى قورعانىس ونەركاسىبى كەشەنىنىڭ دامۋى تىكەلەي قاراجاتقا بايلانىستى. بۇل - ءبىرىنشى جاعى. ەكىنشى جاعىنان، عىلىمي ىزدەنىستەردى ۇيىمداستىرۋ دا ماڭىزدى. ارنايى قور قۇرىلسا، عىلىمي جۇمىستارعا بولەك اقشا بولىنگەن دۇرىس دەپ ەسەپتەيمىن.
مەملەكەت باسشىسى دا قورعانىس ونەركاسىبىن دامىتۋدىڭ باسىم باعىتتارىنىڭ ءبىرى - عىلىمي ازىرلەمەلەردى ىلگەرىلەتۋ ەكەنىن ايتتى. عىلىمي ازىرلەمەلەردىڭ ەسەبىنەن قوسىمشا قۇنى جوعارى تەحنولوگيالاردىڭ اياسى كەڭەيەدى. مۇنىڭ ءبارى ءبىر- بىرىنەن اجىراتۋعا كەلمەيتىن، ءوزارا بايلانىستى دۇنيەلەر. ناقتى ايتساق، قورعانىس باعىتىنداعى عىلىمي زەرتتەۋلەر مەن تاجىريبەلىك- كونسترۋكتورلىق جۇمىستار ارنايى قور ەسەبىنەن قارجىلاندىرىلۋى كەرەك»، - دەيدى ساراپشى.
سونداي- اق ول الەمدە بولىپ جاتقان گەوساياسي جاعدايلاردان قورىتىندى شىعارىپ، ونى قولدانىسقا ەنگىزۋ ماڭىزدى ەكەنىن ايتادى.
«ساراپشىلار اراسىندا پايىم بار، قازىر قازاقستاننىڭ قارۋلى كۇشتەرى ۋكراينا ارمياسىنىڭ 2014 -جىلعى دەڭگەيىندە تۇرعانىن ايتىپ ءجۇر. بۇل كوپ دۇنيەدەن حابار بەرەدى. شىنىمەن دە ۋكراينادا سول كەزدە بولعان جاعدايلارمەن سالىستىرۋعا كەلەتىن پارراللەلدەر بار. ال قازىر ۋكراينانىڭ سول جاعدايدان بەلگىلى ءبىر ساباق الىپ، قارۋلى كۇشتەردىڭ جۇيەسىن وزگەرتكەنىن كورىپ وتىرمىز. ولار اۋماقتىق اسكەر قۇردى. ونىڭ ءتيىمدى بولعانىن ءىس جۇزىندە كورىپ وتىر. وسىنداي باعىتتاعى ماسەلەلەر بىزدە دە قابىلدانىپ جاتىر. ناقتىراق ايتساق، ۋكراينانىڭ تاجىريبەسىنەن شىعارىلعان تالپىنىستار بار، ءبىراق وتە سىلبىر ىسكە اسىپ جاتىر. بۇل ماسەلەگە تولىق كولەمدە ءمان بەرىلىپ جاتقان جوق. قاراجات تا جەتكىلىكتى دەڭگەيدە ءبولىنىپ جاتقان جوق»، - دەيدى نياز بەلگىبەكوۆ.
سونداي- اق ول جەرگىلىكتى بيۋدجەتتىڭ كىرىس ارناسىن كەڭەيتۋ باستاماسى وڭىرلەردىڭ قورعانىس الەۋەتىن ارتتىرادى دەپ وتىر.
«اۋماقتىق اسكەردى ەنگىزۋدەگى ماڭىزدى تاجىريبەنىڭ ءبىرى جەرگىلىكتى اتقارۋشى ورگاندارعا اتالعان اسكەردى ءوز بيۋدجەتى ەسەبىنەن باسقارۋعا بەرۋ بولىپ ەسەپتەلەدى. ولاردى قاجەتتى جابدىقپەن، قارۋ- جاراقتى ساقتاۋ ورىندارىمەن قامتاماسىز ەتۋ سولارعا جۇكتەلەدى. بۇعان دەيىن كورپوراتيۆتىك تابىس سالىعىنىڭ ءبىر بولىگىن جەرگىلىكتى بيۋدجەتكە قالدىرۋ تۋرالى شەشىم قابىلدانسا، مەملەكەت باسشىسى بۇگىنگى جولداۋىندا قوسىمشا قۇن سالىعىن دا جەرگىلىكتى بيۋدجەتتە قالدىرۋ كەرەكتىگىن ايتتى. بۇل باستاما قورعانىس سالاسىنىڭ الەۋەتىن ارتتىرۋعا دا سەرپىن بەرەدى دەپ ويلايمىن»، - دەدى ول.
ساراپشى جولداۋدى ازىرلەۋ كەزىندە قوعام تالقىسىندا جۇرگەن ماسەلەلەردىڭ ءبارى تەرەڭىنەن زەرتتەلگەنىن كورۋگە بولاتىنىن ايتادى.
«كەلەسى جولداۋلاردا بۇعان دەيىنگىلەرىنىڭ ورىندالۋ دەڭگەيىنە باعا بەرىلسە، مۇنداي جوعارى دەڭگەيدەگى باستامالاردىڭ ورىندالۋ كورسەتكىشى جوعارى بولار ەدى»، - دەيدى نياز بەلگىبەكوۆ.
