جاڭا جولداۋ ەكونوميكاعا باعىتتالسا دا، ماڭىزدى الەۋمەتتىك باستامالار شەت قالعان جوق - قارين

استانا. قازاقپارات - مەملەكەتتىك كەڭەسشى ەرلان قارين بيىلعى جولداۋدىڭ ءمانى مەن مازمۇنى پرەزيدەنت رەفورمالارىنىڭ قيسىنىنا ۇندەسەتىنىن ايتتى، دەپ حابارلايدى قازاقپارات ءتىلشىسى.

بيىلعى جولداۋدىڭ ءمانى مەن مازمۇنى پرەزيدەنت رەفورمالارىنىڭ لوگيكاسىنا تولىقتاي سايكەس كەلەدى. قاسىم- جومارت توقايەۆ ەكونوميكا، ساياسات جانە يدەولوگيا سالالارىن ءبىر- بىرىنەن بولمەي رەفورمالاۋعا نەگىزدەلگەن ستراتەگيالىق باعىتتى جۇيەلى تۇردە ىسكە اسىرىپ كەلەدى. جولداۋدا قازاقستان ەكونوميكاسىن دامىتۋدىڭ الداعى ستراتەگياسى بەلگىلەندى. بۇدان بولەك پرەزيدەنت باستامالارى ەكونوميكانىڭ ءبىرقاتار سالاسىنىڭ جاڭا ەرەجەلەرىن ۇسىنىپ وتىر. سونىڭ ارقاسىندا اتقارۋشى بيلىك جۇيەسى، ورتالىق پەن وڭىرلەر اراسىنداعى قارىم- قاتىناس وزگەرەدى، سالىقتىق ىنتالاندىرۋدىڭ، نورماتيۆتىك- قۇقىقتىق رەتتەۋدىڭ، ينۆەستورلارمەن ءوزارا ءىس- قيمىلدىڭ جاڭا شارالارى ەنەدى، - دەپ جازدى ە. قارين Telegram-ارناسىندا.

مەملەكەتتىك كەڭەسشىنىڭ پايىمىنشا، جاڭا جولداۋ ەكونوميكالىق ماسەلەلەردى شەشۋگە باعىتتالسا دا، وندا الەۋمەتتىك سيپاتتاعى ماڭىزدى باستامالار بار.

اتاپ ايتقاندا، جالاقىنى كوتەرۋ، جۇمىسپەن قامتۋ، بالالار قاۋىپسىزدىگى، ءبىلىم الۋداعى تەڭدىك جانە تاعى باسقاسى. مەملەكەت باسشىسىنىڭ قوعامدا قىزۋ تالقىلانىپ جاتقان اەس سالۋعا قاتىستى ماسەلەنى رەسپۋبليكالىق رەفەرەندۋمعا شىعارۋ تۋرالى ۇسىنىسىنا ەرەكشە نازار اۋدارۋ قاجەت. بۇل پرەزيدەنتتىڭ «حالىق ۇنىنە قۇلاق اساتىن مەملەكەت» جانە «ادىلەتتى قازاقستان» پرينتسيپتەرىن بەرىك ۇستانىپ وتىرعانىن كورسەتەدى. جالپى، بۇگىنگى جولداۋدا كوپتەگەن باعىتتاردى قامتيتىن جانە الەۋمەتتىك- ەكونوميكالىق رەفورمالاردىڭ ءبىرىڭعاي جۇيەسىن قۇرايتىن جۇزدەن استام ءتۇرلى يدەيالار مەن ۇسىنىستار ايتىلدى، - دەدى ەرلان قارين.