ءاليحان سمايىلوۆ: جامبىل وبلىسىنداعى ەڭ وزەكتى ماسەلەنىڭ ءبىرى - سۋمەن قامتاماسىز ەتۋ
پرەمەر-ءمينيستردىڭ ايتۋىنشا، بۇگىندە ءوڭىر ءۇشىن ەڭ وزەكتى ماسەلەلەردىڭ ءبىرى سۋمەن قامتاماسىز ەتۋ بولىپ وتىر. ماسەلەن، وبلىستاعى 367 اۋىلدىڭ 285 ءى عانا اۋىزسۋمەن قامتىلعان. وبلىس ورتالىعى ورتالىقتاندىرىلعان سۋمەن %94 عا، شۋ قالاسى %67 عا قامتاماسىز ەتىلگەن.
سۋ تارتۋ بويىنشا دا پروبلەمالار بار. اتاپ ايتقاندا، وبلىس ورتالىعىندا كارىز-تازارتۋ قۇرىلىستارى جوق، ال 1962-جىلى سالىنعان اعىن سۋلاردى ءسۇزۋ الاڭدارىنىڭ ابدەن توزىعى جەتكەن.
«شۋ جانە تالاس وزەندەرىندەگى سۋ دەڭگەيىنىڭ تومەندەۋىنە، سۋارۋ جۇيەلەرىنىڭ توزۋىنا بايلانىستى وبلىس ەگىنشىلەرى جىل سايىن سۋدان تاپشىلىق كورىپ وتىر. وسى ماسەلەلەر بويىنشا شۇعىل جانە تۇبەگەيلى شارالار قابىلداۋ كەرەك»، - دەدى ءاليحان سمايىلوۆ.
وسىعان بايلانىستى ۇكىمەت باسشىسى سۋ ۇنەمدەيتىن تەحنولوگيالاردى بەلسەندى پايدالانىپ، گيدروتەحنيكالىق قۇرىلىستاردى جاڭعىرتىپ، ماگيسترالدىق كانالداردى بەتونداۋ قاجەتتىگىن ايتتى. وعان قوسا ۆەگەتاتسيالىق كەزەڭدە سۋ ىسىرابىن بولدىرماۋ ءۇشىن ءۇش ۇلكەن، سونداي-اق ءبىرقاتار شاعىن سۋ قويماسىن سالۋ كەرەك.
ءوڭىردىڭ دامۋ پەرسپەكتيۆالارىن ەسكەرە وتىرىپ، پرەمەر-مينيستر جىلۋمەن جابدىقتاۋ نىساندارى مەن جەلىلەرىنە، ونىڭ ىشىندە مونوقالالاردا تەحنيكالىق تەكسەرۋ جانە جاڭعىرتۋ جۇمىستارىن جۇرگىزۋ قاجەتتىگى تۋرالى ايتتى.
ۇكىمەت باسشىسى جامبىل، جۋالى، قورداي، مويىنقۇم جانە تالاس اۋداندارىنىڭ ەلدى مەكەندەرىن گازداندىرۋ جوبالارىنا قارجى ءبولۋ مۇمكىندىگىن قاراستىرۋدى، بيوفارماتسيەۆتيكالىق زاۋىتتىڭ وندىرىستىك قۋاتىن ۇلعايتۋ ماقساتىندا قۇرىلىس جۇمىستارىنىڭ 2-كەزەڭىن بيىل جىل سوڭىنا دەيىن اياقتاۋدى، تاراز، جاڭاتاس، قاراتاۋ جانە شۋ قالالارىنداعى كوپقاباتتى تۇرعىن ۇيلەردى كۇردەلى جوندەۋ جوبالارىن قارجىلاندىرۋ ماسەلەسىن قاراستىرۋدى تاپسىردى.
