ءاليحان سمايىلوۆ جامبىل وبلىسىنداعى ينۆەستيتسيالىق جوبالارمەن تانىستى

استانا. قازاقپارات - پرەمەر-مينيستر ءاليحان سمايىلوۆ جامبىل وبلىسىنا جۇمىس ساپارى بارىسىندا «ەۆروحيم-قاراتاۋ» ج ش س ءىرى حيميالىق كەشەنىنىڭ قۇرىلىس جوباسىمەن جانە «تاراز حيميالىق پاركى» ا ە ا بازاسىنداعى جاڭا ينۆەستيتسيالىق جوبالارمەن تانىستى، دەپ حابارلايدى قازاقپارات ۇكىمەتتىڭ باسپا ءسوز قىزمەتىنە سىلتەمە جاساپ.

بۇگىندە ءوڭىردىڭ ونەركاسىپ سالاسىندا 838 كاسىپورىن جۇمىس ىستەيدى، ال جۇمىسپەن قامتىلعاندار سانى - 43 مىڭ ادام. بيىلعى 7-ايدىڭ قورىتىندىسىنا سايكەس وبلىستا وندىرىلگەن ءونىم كولەمى 510 ميلليارد تەڭگەگە (%7,8+) جەتتى.

«ەۆروحيم» كومپانياسى اۋقىمدى ينۆەستيتسيالىق جوبانىڭ ءبىرىنشى كەزەڭىن جۇزەگە اسىردى: تاۋ-كەن كەشەنىنىڭ بازاسىندا جىلىنا 660 مىڭ تونناعا دەيىن فوسفوريتتەر ءوندىرۋ جولعا قويىلدى. قۋاتتىلىعى جىلىنا 640 مىڭ توننا ورتاشا ۇساقتاۋ جانە ۇساق ۇنتاقتاۋ قوندىرعىسى سالىندى.

ينۆەستيتسيا كولەمى - $126 ميلليون.

ەكىنشى كەزەڭ شەڭبەرىندە مينەرالدى تىڭايتقىشتار شىعاراتىن حيميا كەشەنىنىڭ قۇرىلىسى باستالدى. وندىرىستىك قۋاتتىلىعى جىلىنا كەمىندە 1 ميلليون تونناعا جەتەدى. ەكىنشى كەزەڭدى جۇزەگە اسىرۋ $1 ميللياردتان استام تىكەلەي شەتەلدىك ينۆەستيتسيا تارتۋعا جانە 1200 جاڭا جۇمىس ورنىن اشۋعا مۇمكىندىك بەرەدى.

پرەمەر-مينيستر ۇكىمەتتىڭ حيميا ونەركاسىبىندەگى جوبالاردى جۇزەگە اسىرۋعا ۇلكەن كوڭىل ءبولىپ وتىرعانىن، سوندىقتان جاڭا ءىرى زاۋىتتىڭ ءوڭىردىڭ عانا ەمەس، جالپى رەسپۋبليكانىڭ دامۋى ءۇشىن دە ماڭىزى زور ەكەنىن باسا ايتتى.

«بۇل جوبانى ىسكە قوسۋ اۋىل شارۋاشىلىعى سالاسىنىڭ قاجەتتى مينەرالدى تىڭايتقىشتارعا دەگەن سۇرانىسىن ءتيىستى دەڭگەيدە قامتاماسىز ەتەدى جانە قوسىمشا جۇمىس ورىندارىن اشۋعا مۇمكىندىك بەرەدى. سوندىقتان ىشكى جانە سىرتقى نارىقتا سۇرانىسقا يە ءونىمدى تەزىرەك شىعارۋ ءۇشىن زاۋىتتى ۋاقتىلى ىسكە قوسۋدىڭ ماڭىزى زور»، - دەدى ءاليحان سمايىلوۆ.

ءارى قاراي ءاليحان سمايىلوۆ شۋ اۋدانىندا ورنالاسقان «تاراز حيميالىق پاركى» ارنايى ەكونوميكالىق ايماعىنىڭ قىزمەتىمەن تانىستى. سونىمەن قاتار پرەمەر-مينيسترگە «TAS Market» ج ش س- نىڭ ونەركاسىپتىك كرەمني، گرافيت ەلەكترودتارى، پوليكرەمني جانە كۇن باتارەيالارى ءوندىرىسى جولعا قويىلعان كرەمنيي كلاستەرىن قۇرۋ جونىندەگى ينۆەستيتسيالىق جوباسى تانىستىرىلدى. سونداي-اق «Qazaq Soda» ج ش س جۇزەگە اسىرىپ جاتقان ەلىمىزدەگى كالتسيلەندىرىلگەن سودا شىعاراتىن العاشقى زاۋىت قۇرىلىسىنىڭ جوباسى تانىستىرىلدى.

«ءبىز بۇل جوبالاردى قولدايمىز جانە جەتىسپەيتىن ينفراقۇرىلىمدى تارتۋ بويىنشا جۇمىستاردى جالعاستىراتىن بولامىز. مۇنى ءبىر جىل ىشىندە ىسكە اسىرۋعا بولادى. يندۋستريا مينيسترلىگى مەن ق ت ج- عا ءتيىستى تاپسىرما بەرەمىن»، - دەپ تۇيىندەدى ءسوزىن ءاليحان سمايىلوۆ.