بالاسىن ءولتىرىپ، كومىپ تاستاعان اقتوبەلىك سوتتا سوڭعى ءسوزىن ايتتى

اقتوبە. قازاقپارات - ءوزىنىڭ 4 جاسار بالاسى دانيل احۋنوۆتى ءولتىردى دەپ ايىپتالىپ جاتقان ارتۋر احۋنوۆ سوتتا سوڭعى ءسوزىن ايتتى. ول سوت ساراپتامالارىمەن كەلىسپەيتىنىن، ءوزىن كىنالى سانامايتىنىن مالىمدەدى، دەپ حابارلايدى قازاقپارات ءتىلشىسى.
None

اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا ارتۋر احۋنوۆ سوڭعى ءسوزىن ايتتى. ول ءوزىن كىنالى دەپ سانامايدى. ءتىپتى، بالالاردى جاقسى كورگەنىن العا تارتىپ، كوزىنە جاس الدى.

مەنىڭ ومىرىمدە ءۇش بالا پايدا بولعاندا وتە قۋانىشتى بولدىم. ءار ادام بالاسى ءۇشىن قولدان كەلگەنىن جاسايدى دەپ ويلايمىن. مەن دە ءدال سولاي جاسادىم. ءبىراق، وتباسىنداعى ءومىرىمىز جاقسى بولمادى. سەبەبى، ايەلىم ەسكىرتكى پايدالانا باستادى. ول بىرنەشە رەت ەسكىرتكىدەن باس تارتاتىنىن ايتتى. ءبىراق، ونى ۇنەمى ەسى كىرەسىلى- شىعاسىلى كۇيىندە تاپتىم. ءسويتىپ بالالار نازاردان تىس قالدى. مەن ۇناتىپ، جاقسى كورگەن ادام وتە قاتتى وزگەردى. سوڭىندا ونىڭ وزىنە جانە بالالارعا دەگەن بەيقامدىعى مەنىڭ ءتوزىمىمدى تاۋىستى. «ەگەر ەسكىرتكىگە اقشا بەرمەسەڭ، بالالاردى كورە المايسىڭ» دەپ قوقانلوققى دا جاسادى. بالالاردى الىپ، كۇيەۋىنە كەتەتىنىن ايتتى. ءبىزدىڭ ارامىزداعى قاتىناس - ازاماتتىق نەكە بولدى. ول كەزدە زاڭدى نەكەدە تۇرعان كۇيەۋىمەن اجىراسپاعان ەدى. ال مەن كۇنى بويى جۇمىس ىستەپ، وتباسىما بارىنشا قامقور بولدىم. ەكەۋمىز ەكى جاققان كەتكەن سوڭ يۋليا اتا- انا قۇقىعىنان ايىرىلدى. ماعان ينسپەكتور حابارلاسىپ، بالالاردى «ءۇمىت» سابيلەر ۇيىنە بەرىپ جاتقانىن ايتتى. كەيىن «ءۇمىت» سابيلەر ۇيىنەن حابارلاسىپ، بالالار تاعدىرىنا الاڭداسام كەزدەسۋگە كەلۋىمدى سۇرادى. باردىم، الەۋمەتتىك پەداگوگپەن اڭگىمەلەستىم. ول ماعان «بالالار كەرەك پە؟» دەپ سۇرادى. مەن «ءيا» دەپ جاۋاپ بەردىم. اسىراپ الۋعا، سونىڭ ىشىندە د ن ق سىناماسىنا قاجەتتى قۇجاتتىڭ ءتىزىمىن قولىما ۇستاتتى. قاجەتتى قۇجاتتاردى جيناۋعا ءبىر جىل ۋاقىت كەتتى. وسى ۋاقىت ارالىعىندا مەن بالالارعا بارىپ، ۇنەمى ازىق- تۇلىك پەن ويىنشىق، قاجەتتىلىكتەرىن اپارىپ تۇردىم. ولاردى قۋانتتىم، جالعىز قالدىرمادىم. رەسمي اكەسى دەپ تانىعان سوڭ بالالاردى الىپ كەتتىم، - دەدى سوڭعى سوزىندە سوتتالۋشى.

ول از ۋاقىت اناسىمەن بىرگە تۇرعان. بالالارى توبەلەسكەن سوڭ اناسىمەن سوزگە كەلىپ، پاتەر جالدايدى.

پاتەردە جازاتايىم وقيعا بولىپ، دانيل كوز جۇمدى. بۇل تۋرالى مەن سوت وتىرىسىندا ايتتىم. سول كۇنگى وقيعا ءالى كۇنگە دەيىن كوز الدىمدا. مەن جىندانىپ كەتەمىن بە دەپ تە ويلادىم. بالامنان ايىرىلعانداعى جان كۇيزەلىسى ءالى دە بار، سەنگىم كەلمەيدى. بالكىم سوندىقتان دا شىعار، مەن پوليسياعا حابارلاسىپ، جوعالىپ كەتكەنى تۋرالى حابارلادىم. ءومىردىڭ ءمانى كەتتى. تەرگەۋ باستالدى. ول كەزدە ورەسكەل زاڭبۇزۋشىلىق جىبەرىلدى. سوت- مەديتسينالىق ساراپتاما دۇرىس جاسالمادى. پوليگرافيالىق ساراپتامامەن دە كەلىسپەيمىن. پسيحولوگيالىق ساراپتاما قورىتىندىسى دا تەرگەۋگە قولايلى شىعارىلدى. الدادى، ماعان جانە اناما مورالدىق تۇرعىدا قىسىم كورسەتتى. انامنىڭ ۆيدەوسىن كورسەتىپ، «ءوزىڭ مويىنداماساڭ، اناڭدى وتىرعىزامىز» دەپ ايتتى. ءسويتىپ مەنى ماجبۇرلەدى. بۇعان دەيىن زاڭسىزدىقتاردى ايتىپ، پروكۋراتۋراعا ارىز جازدىم. ءبىراق ەشتەڭە بولمادى. سوت، وسى زاڭسىزدىقتارعا نازار اۋدارۋىڭىزدى سۇرايمىن. بالام دانيلدىڭ ولىمىنە كىنالى دەپ تانىماۋىڭىزدى سۇرايمىن. مەن بار بالامدى جاقسى كورەمىن. ماعان مۇمكىندىك بەرىپ، جاعدايدى وزگەرتۋگە بولادى دەپ ويلايمىن. ەكى بالام بار. انام ينسۋلت العان. بار ءومىرىمدى اناما، بالالارعا ارناعىم كەلەدى. مەنىڭ ءسوزىمدى ەستيسىز دەپ ويلايمىن، - دەدى ارتۋر احۋنوۆ.

ەسكە سالساق، بىلتىر 4 جاسار دانيل احۋنوۆتىڭ جولعالىپ كەتكەنى تۋرالى پوليتسياعا حابار ءتۇسىپ، ىزدەۋ جۇمىستارىنا ەرىكتىلەر دە ارالاستى. كەيىن پوليتسيا بالانىڭ اكەسىن قاماپ، دەنەسىن قايدا كومگەنىن انىقتادى. بۇعان دەيىنگى سوت وتىرىسىندا سوتتالۋشى ارتۋر احۋنوۆ ءبارى دە جازاتايىم وقيعا ەكەنىن، بالالارى توبەلەسكەندە دانيلدىڭ قۇلاپ، باسىن جارالاعانىن العا تارتتى. پروكۋرور جارىسسوزدە ءومىر بويى باس بوستاندىعىنان ايىرۋدى سۇرادى.

بۇگىن تۇستەن كەيىن سوت ۇكىمى شىعادى.


سوڭعى جاڭالىقتار