تۇركى ەلدەرىنىڭ كاسىپوداق ۇيىمى قۇرىلادى

قازاقپارات بۇل تۋرالى ق ر كاسىپوداقتار فەدەراتسياسىنىڭ مەديا ورتالىعىنا سىلتەمە جاساپ حابارلايدى.
كەلىسىمگە ازەربايجان كاسىپوداقتار كونفەدەراتسياسىنىڭ ءتوراعاسى ساتتار موحباليەۆ، قازاقستان رەسپۋبليكاسى كاسىپوداقتار فەدەراتسياسىنىڭ ءتوراعاسى ساتىبالدى داۋلەتالين، «Türk-İş» تۇرىك كاسىپوداقتارى كونفەدەراتسياسىنىڭ پرەزيدەنتى ەرگيۋن اتالاي، وزبەكستان كاسىپوداقتار فەدەراتسياسى ءتوراعاسىنىڭ ورىنباسارى باحتيەر ماحماداليەۆ قول قويدى.
قىرعىزستان ۇيىمعا باقىلاۋشى مارتەبەسىندە قاتىسادى.
جاڭا قۇرىلىمنىڭ نەگىزگى ماقساتى - ەڭبەككەرلەردىڭ الەۋمەتتىك، ەڭبەك، كاسىپتىك، ەكونوميكالىق قۇقىقتارى مەن مۇددەلەرىن قورعاۋ جونىندەگى ءىس- شارالاردى بىرىكتىرۋ.
ساتتار موحباليەۆتىڭ ايتۋىنشا، كاسىپوداق ۇيىمىنىڭ قۇرىلۋى تۇركى مەملەكەتتەرىنىڭ بىرىگۋىنە بەرىك نەگىز قالادى.
تۇركى حالىقتارىنىڭ ماقسات- مۇددەسى ءبىر ەكەندىگىن قازاقستان رەسپۋبليكاسى كاسىپوداقتار فەدەراتسياسىنىڭ ءتوراعاسى ساتىبالدى داۋلەتالين ەرەكشە اتاپ ءوتتى.
«ءبىزدى، باۋىرلاس تۇركى حالىقتارىنىڭ وكىلدەرىن ورتاق تاريحي تامىر، ورتاق مادەنيەت پەن ءداستۇر، ورتاق ماقسات پەن ورتاق مۇددە بىرىكتىرەدى. تۇركى ەلدەرىنىڭ ورتاق مۇددەلەرى عانا ەمەس، سان عاسىرلىق تاريحى دا ورتاق ەكەنىن اتاپ وتكىم كەلەدى. سوڭعى وتىز جىلدا تۇركى تىلدەس مەملەكەتتەردىڭ ىنتىماقتاستىعى تابىستى دامىپ، بۇل مەحانيزمدى ۇكىمەتارالىق ۇيىمنان (تۇركى كەڭەسى) ايماقتىق حالىقارالىق ۇيىمعا (ت م ب) دەيىن جەتىلدىردى»، - دەدى ول.
الداعى ىنتىماقتاستىقتىڭ نەگىزگى باعىتتارىنىڭ قاتارىندا س. داۋلەتالين الدىڭعى قاتارلى كاسىپوداق تاجىريبەسىن ىلگەرىلەتۋدى، تاجىريبە الماسۋدى جانە جالپى تۇركى مەملەكەتتەرىنىڭ ەڭبەك نارىعىنداعى جاعدايدى وزگەرتۋدى اتادى.