10:38, 28 - شىلدە 2023 | GMT +5
قازاقستان پاريج وليمپياداسىنا رەسمي تۇردە شاقىرتۋ الدى
استانا. قازاقپارات - قازاقستانعا 2024 -جىلى پاريجدە وتەتىن جازعى وليمپيادا ويىندارىنا قاتىسۋعا رەسمي تۇردە شاقىرتۋ كەلدى، دەپ حابارلايدى قازاقپارات ءتىلشىسى مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.

«ق ر مادەنيەت جانە سپورت مينيسترلىگى قازاقستان پاريجدەگى XXXIII جازعى وليمپياداعا رەسمي تۇردە شاقىرۋ العانىن حابارلايدى. رەسمي قۇجاتتى حالىقارالىق وليمپيادا كوميتەتى قازاقستان رەسپۋبليكاسىنىڭ ۇلتتىق وليمپيادا كوميتەتىنە جولدادى»، - دەلىنگەن حابارلامادا.
وليمپيادا ويىندارى 2024 -جىلدىڭ 26 -شىلدەسى مەن 11- تامىزى ارالىعىندا فرانسيا استاناسى - پاريج قالاسىندا وتەدى.
ايتا كەتەيىك، 14- ماۋسىمدا قازاقستان پاريج وليمپياداسىنىڭ العاشقى ليتسەنزياسىن جەڭىپ الدى.
ەسكە سالساق، 2021 -جىلى توكيودا وتكەن وليمپيادادا 97 قازاقستاندىق سپورتتىڭ 28 تۇرىنەن باق سىنادى. ناتيجەسىندە 8 قولا مەدال جەڭىپ الدى.