13:55, 25 - شىلدە 2023 | GMT +5
ۇكىمەت باسشىسى اۋىلعا بولىنگەن قارجىنى يگەرمەگەن وڭىرلەردى سىنادى
استانا. قازاقپارات - بۇگىن ۇكىمەت وتىرىسىندا «اۋىل - ەل بەسىگى» جوباسىنا بولىنگەن قارجىنى ۋاقتىلى يگەرمەگەن وڭىرلەر اتالدى، دەپ حابارلايدى قازاقپارات ءتىلشىسى.

«وتكەن جىلى ۇلىتاۋ وبلىسىنىڭ اتاسۋ، بيدايىق، بوستۇمسىق جانە سارىسۋ اۋىلدارىندا مەديتسينا مەكەمەلەرىنىڭ قۇرىلىسىنا قاجەتتى قاراجات تولىعىمەن بولىنگەن بولاتىن. الايدا، قۇرىلىس جۇمىستارى ءالى كۇنگە دەيىن اياقتالماعان.
س ق و- نىڭ مۇسىرەپوۆ اتىنداعى اۋداندا ۇزىندىعى 53,5 شاقىرىم بولاتىن جول قۇرىلىسى بىلتىر ءبىتۋ كەرەك ەدى. ءبىراق، جوسپارلانعان كولەمنەن نەبارى 26,5 شاقىرىم جول پايدالانۋعا بەرىلگەن. دەمەك، جوسپاردىڭ %50 ءالى كۇنگە ورىندالماي وتىر»، - دەدى پرەمەر-مينيستر ءاليحان سمايىلوۆ ۇكىمەت وتىرىسىندا.
مينيسترلەر كابينەتى باسشىسىنىڭ ايتۋىنشا، وڭىرلەردە قاراجاتتى ءتيىمدى پايدالانۋ وتە ماڭىزدى.
«ءبىر اۋداندا بىرنەشە جوبا ىسكە اسىرىلىپ، باسقا اۋداندا بىردە-ءبىر جوبا ىسكە اسىرىلمايتىن جاعدايلار بولماۋى كەرەك»، - دەيدى ول.