شەتەلدە قۇراستىرىلعان كولىكتەر ءجيى ورتەنەدى

مۇنى استانا قالاسىنىڭ كوممۋنيكاتسيالار قىزمەتىندە وتكەن بريفينگىدە توتەنشە جاعدايلار دەپارتامەنتى مەملەكەتتىك ءورت باقىلاۋ باسقارماسىنىڭ باستىعى ەركىن وتارعالىم ۇلى ايتتى، دەپ حابارلايدى قازاقپارات ءتىلشىسى.
«ءورتتىڭ باسىم دەنى شەت ەلدەردە قۇراستىرىلعان اۆتوموبيلدەردە بولادى. ۇزاق قىزمەت ەتۋ مەرزىمى دە، باسەكەلەستىك ورتادا تەحنيكالىق تەكسەرۋدىڭ ساپاسىز جۇرگىزىلۋى دە اسەر ەتەدى»، - دەدى ەركىن وتارعالىم ۇلى.
سپيكەر ءورتتىڭ الدىن الۋ ءۇشىن تەحنيكالىق تەكسەرۋدەن ءوتۋ تارتىپتەرىن قاتاڭداتۋ بويىنشا شارالار قابىلدانىپ جاتقانىن اتاپ ءوتتى.
سونداي-اق ول مىنا ەرەجەلەر مەن تالاپتاردى ۇنەمى قاپەردە ۇستاۋعا شاقىردى:
- كولىكتەرگە اقاۋلاردى ۋاقىتىلى جويۋ، ەلەكتر سىمداردى، باك جانە بەنزين تۇراتىن جۇيەلەردىڭ تەحنيكالىق جاي-كۇيىن باقىلاۋ؛
- قوسىمشا جابدىقتى ورناتۋ جانە قىزمەت كورسەتۋ شارالارىن تەك مامانداندىرىلعان ورتالىقتاردا جۇرگىزۋ؛
- كولىكتە ءورت سوندىرگىش باللونداردىڭ بولۋى؛
- سالقىن كۇندەرى قوزعالتقىشتى اشىق كۇيدەگى وتپەن جىلىتپاۋ.