پرەزيدەنت: جارقىراعان ءزاۋلىم عيماراتتار، باي اۋداندار مەن ناعىز لاشىقتار، جارتىلاي بۇزىلعان عيماراتتار - بۇل ءبىزدىڭ جولىمىز ەمەس
استانا. قازاقپارات - جارقىراعان ءزاۋلىم عيماراتتار، باي اۋداندار مەن ناعىز لاشىقتار، جارتىلاي بۇزىلعان عيماراتتار - بۇل ءبىزدىڭ جولىمىز ەمەس.
بۇل تۋرالى ەلوردانى دامىتۋ ماسەلەلەرى جونىندەگى كەڭەستە مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«كاسىپكەرلىكتىڭ الەۋەتىن ىسكە قوسۋ جانە جەكە قۇرىلىس سالۋشىلاردىڭ ينۆەستيتسيالىق بەلسەندىلىگىن ىنتالاندىرۋ قاجەت دەپ سانايمىن. ينۆەستورلار قايتا جاڭارتۋ اۋماعىندا جەر ۋچاسكەلەرىن بۇزۋعا جانە ساتىپ الۋعا قاراجات جۇمساعىسى كەلمەيتىنى تۇسىنىكتى. ولارعا استانانىڭ سول جاعالاۋىندا دايىن ينجەنەرلىك جەلىلەرى بار بوس كەڭىستىكتەردە سالۋ تيىمدىرەك. ءبىراق ىمىرا تابۋ كەرەك. وڭ جاعالاۋدى - قالانىڭ ەسكى بولىگىن كۇتىپ ۇستاۋعا جانە دۇرىس دامىتۋعا نازار اۋدارۋ كەرەك، ونىڭ وزىندىك حاريزماسى بار. بىزگە استانانىڭ تەپە- تەڭ دامۋى قاجەت» ، - دەدى قاسىم- جومارت توقايەۆ.
مەملەكەت باسشىسىنىڭ ايتۋىنشا، ينۆەستورلار اپاتتى نىسانداردى ءسۇرىپ، تۇرعىندارىن باسقا ۇيلەرگە قونىستاندىرۋى قاجەت. ال بوساتىلعان ۋچاسكەلەردە جاڭا ۇيلەر سالۋى كەرەك. اكىمدىك ءوز تاراپىنان ولارعا قاجەتتى جاعداي جاساۋعا ءتيىس. قالالىق ينجەنەرلىك ينفراقۇرىلىمدى دامىتۋ، جولدار مەن الەۋمەتتىك نىساندار سالۋ قاجەت. وسىلايشا، اپاتتى جانە توزىعى جەتكەن تۇرعىن ءۇي ماسەلەسىن جالپى كۇش- جىگەرمەن شەشۋگە بولادى.
«مۇنان بولەك، بۇل قالا ورتالىعى مەن ونىڭ توڭىرەگىنىڭ دامۋىنداعى تەڭگەرىمسىزدىكتەردى جويۋعا كومەكتەسەدى. قالانىڭ ەسكى بولىگىنىڭ سىرتقى كەلبەتى دە تۇرلەنەدى. ادامداردىڭ جايلى ءومىر ءسۇرۋىن قامتاماسىز ەتەتىن ۇزدىك قالا قۇرىلىسى شەشىمدەرى استانانىڭ بارلىق اۋماعىندا پايدالانىلۋى ءتيىس. جارقىراعان ءزاۋلىم عيماراتتار، باي اۋداندار مەن ناعىز لاشىقتار، جارتىلاي بۇزىلعان عيماراتتار - بۇل ءبىزدىڭ جولىمىز ەمەس. جاعدايدى «تەڭەستىرۋ» كەرەك. ءادىل قوعام قۇرۋ يدەياسىنىڭ ءمانى دە وسىندا جاتىر»، - دەدى پرەزيدەنت.
