قاسىم- جومارت توقايەۆ: استانانى جىلۋمەن قامتاماسىز ەتۋ جۇيەسى ورنىقتى بولۋى قاجەت
استانا. قازاقپارات - مەملەكەت باسشىسى قاسىم- جومارت توقايەۆ ەلوردانى دامىتۋ ماسەلەلەرى جونىندەگى كەڭەستە استانانى جىلۋمەن قامتاماسىز ەتۋ جۇيەسى ورنىقتى بولۋى قاجەت ەكەنىن ەسكەرتتى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.
«ەندى الداعى جۇمىستىڭ نەگىزگى باعىتتارىنا توقتالايىن.
ءبىرىنشى ماسەلە. استانانى جىلۋمەن قامتاماسىز ەتۋ جۇيەسى ورنىقتى بولۋى قاجەت. ەلورداداعى نەگىزگى وزەكتى ماسەلەلەر قالانىڭ دامۋىنا قاتىستى ءتيىستى جوسپاردىڭ، ياعني دۇرىس جوسپارلاۋ جۇمىسىنىڭ جوقتىعىنان تۋىنداپ وتىر. مۇنى اشىق ايتۋىمىز كەرەك. باقىلاۋسىز جۇرگىزىلىپ جاتقان قۇرىلىس، ساپادان گورى سانعا ءمان بەرۋ جانە جان- جاقتى ويلاستىرىلماعان شەشىمدەر قالاداعى ومىرلىك ماڭىزى بار ينفراقۇرىلىمنىڭ تاپشىلىعىنا الىپ كەلدى.
جاعدايدىڭ سونشالىقتى مۇشكىل بولۋىنا جاۋاپتى باسشىلاردىڭ بىلىكسىزدىگى نەمەسە باس پايداسىن ويلاعاندىعى سەبەپ بولدى. قالا باسشىلىعى قۇرىلىس كومپانيالارىنىڭ پايداسىن ەمەس، مەملەكەت پەن ازاماتتاردىڭ مۇددەسىن بارىنەن بيىك قويۋعا ءتيىس»، - دەدى مەملەكەت باسشىسى.
