كەيبىرەۋلەر پوليتسەيگە ادەيى ءتيىسىپ، ارانداتادى، سونداي كەزدە ۇستامدىلىق تانىتۋ ماڭىزدى - توقايەۆ

قاسىم- جومارت توقايەۆ ىشكى ىستەر مينيسترلىگىنىڭ القا ماجىلىسىندە وسىنداي ۇسىنىس ايتتى، دەپ حابارلايدى قازاقپارات.

«الەۋمەتتىك جەلىدە پوليتسياعا قاتىستى ءتۇرلى بەينەجازبالار بار. كەيبىر ادامدار قاساقانا ارانداتۋشىلىق جاسايدى. سونداي كەزدە ۇستامدىلىق تانىتىپ، دورەكى ارەكەتتەرگە جول بەرمەۋ وتە ماڭىزدى. ءتارتىپ ساقشىسى ساۋاتتى سويلەپ، ءوزىن لايىقتى ۇستاۋى قاجەت. پوليتسيا قىزمەتكەرى زاڭداردى انىق بىلۋگە ءتيىس، ياعني ەلىمىزدىڭ زاڭدارىن جۇرتقا قاراپايىم تىلمەن تۇسىندىرۋگە دايىن بولۋى قاجەت. سوندا عانا پوليتسيا مەن حالىق اراسىندا مىزعىماس كەلىسىم بولادى. ارينە، وفيتسەرلەردىڭ اراسىندا كاسىبي بىلىكتى، انتىنا ادال ازاماتتار كوپ. سونداي قىزمەتكەرلەر وزگەلەرگە، اسىرەسە، جاستارعا ۇلگى- ونەگە كورسەتۋدە. وسىنداي ۇزدىك قىزمەتكەرلەردى قولداۋ قاجەت. ەرلىك كورسەتكەن وفيتسەر، سەرجانتتار تۋرالى جۇرت بىلۋگە ءتيىس. بۇل - ءبىزدىڭ ءتيىستى مينيسترلىكتىڭ جانە جالپى بۇقارالىق اقپارات قۇرالدارىنىڭ مىندەتى. وزدەرىڭىزگە ءمالىم، مەملەكەت ىشكى ىستەر ورگاندارىنىڭ جۇمىسىن ءاردايىم جوعارى باعالايدى»، - دەپ تۇيىندەدى مەملەكەت باسشىسى.

تاۋلىك بويى ساقاداي ساي بولۋ ءۇشىن ەرەكشە قاجىر- قايرات پەن توزىمدىلىك قاجەت.

«بارشاڭىزعا ءمالىم، ىشكى ىستەر مينيسترلىگى - مەملەكەتتىك باسقارۋ جۇيەسىندە ايرىقشا ءرول اتقاراتىن قۇرىلىم. قوعامدىق ءتارتىپتى ساقتاۋ، قىلمىسپەن كۇرەسۋ - اسا ماڭىزدى مىندەت. ازاماتتاردىڭ جانە بۇكىل مەملەكەتتىڭ قاۋىپسىزدىگى وسى مىندەتتەرگە تىكەلەي بايلانىستى.

ءتارتىپ ساقشىلارىنىڭ قىزمەتى وڭاي ەمەس. كۇنى- ءتۇنى جۇمىس ىستەيتىن كەزدەر ءجيى بولادى. قاۋىپ- قاتەر دە بار. تاۋلىك بويى، ياعني 24 ساعات بويى ساقاداي ساي بولۋ ءۇشىن ەرەكشە قاجىر- قايرات پەن توزىمدىلىك قاجەت. سەبەبى قيىن جاعدايعا تاپ بولعان جاندار، ەڭ الدىمەن، پوليتسيادان كومەك كۇتەدى. ازاماتتارىمىز سىزدەرگە مەملەكەتتىڭ، ياعني بيلىكتىڭ وكىلى رەتىندە قارايدى. قاۋىپ- قاتەردەن قورعايدى دەپ سەنەدى. سوندىقتان سىزدەرگە ءاردايىم وراسان زور جاۋاپكەرشىلىك جۇكتەلەدى.

جالپى پوليتسيانىڭ ساپالى جۇمىسى ەل ءۇشىن، حالىق ءۇشىن وتە قاجەت. ءبىز ءبارىمىز، ءبىرتۇتاس قوعام بولىپ پوليتسيا قىزمەتكەرلەرىنە جان- جاقتى قولداۋ كورسەتۋىمىز قاجەت. ءدال وسىنداي قولداۋدى ءبىز مىندەتتى تۇردە كورسەتەمىز. پوليتسيا قوعامدا حالىقتىڭ قۇرمەتىنە يە ماماندىقتىڭ ءبىرى بولۋى كەرەك. ال پوليتسيا قىزمەتكەرلەرى، ەڭ الدىمەن، ءوز ەلىنە، حالقىنا ادال قىزمەت ەتۋگە ءتيىس. سوندىقتان ءبىز قازىر ىشكى ىستەر ورگاندارىنىڭ جۇمىسىن جەتىلدىرۋگە باسا ءمان بەرىپ وتىرمىز»، - دەدى ق. توقايەۆ.