سەنات سەمەي يادرولىق قاۋىپسىزدىك ايماعى تۋرالى زاڭدى ماقۇلدادى

سەناتتىڭ اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ مالىمەتىنە قاراعاندا، قۇجاتتاعى نورمالار بۇرىنعى سەمەي يادرولىق سىناق پوليگونى مەن وعان ىرگەلەس جاتقان جەرلەردىڭ اۋماعىنداعى رادياتسيالىق جانە ەكولوگيالىق قاۋىپسىزدىك دەڭگەيىن قامتاماسىز ەتەدى. ونىڭ ىشىندە، ەلدىڭ عىلىمي الەۋەتىن دامىتۋ بويىنشا مەملەكەتتىك باقىلاۋدى كۇشەيتۋدە، يادرولىق ەنەرگيانى بەيبىت ماقساتتا پايدالانۋدا جانە باسقا دا باعىتتاردا قازاقستاننىڭ ۇستانىمىن نىعايتۋ ەسكەرىلگەن.

زاڭدا مىنالار:

- كەشەندى ەكولوگيالىق زەرتتەۋ جانە مەملەكەتتىك ەكولوگيالىق ساراپتاما ناتيجەلەرىنىڭ نەگىزىندە سەمەي يادرولىق سىناق پوليگونىنىڭ نورماتيۆتەن تىس لاستانعان ۋچاسكەلەرىندە سەمەي يادرولىق قاۋىپسىزدىك ايماعىن (س ي ا ق ا) قۇرۋ؛

- س ي ا ق ا اۋماعىندا يادرولىق جانە رادياتسيالىق قاۋىپسىزدىكتى قامتاماسىز ەتۋ؛

- س ي ا ق ا جەرلەرىن ۆەدومستۆولىق باعىنىستى ۇيىمنىڭ جەر پايدالانۋىنا بەرۋ؛

- ۆەدومستۆولىق باعىنىستى ۇيىمعا سياقا قاۋىپسىزدىگىن قامتاماسىز ەتۋ، الەۋەتىن دامىتۋ جونىندەگى نەگىزگى مىندەتتەردى جۇكتەۋ ەسكەرىلگەن.

«زاڭدى ىسكە اسىرۋ 2027 -جىلعا دەيىن رەسپۋبليكالىق بيۋدجەتتەن 3 ميلليارد 596 ميلليون تەڭگە سوماسىندا قوسىمشا قارجى شىعىندارىن تالاپ ەتەدى. شىعىندار رەسپۋبليكالىق بيۋدجەت كوميسسياسىندا قولداۋ تاپتى»، - دەلىنگەن سەنات كوميتەتىنىنىڭ مالىمەتىندە.

سەمەي يادرولىق قاۋىپسىزدىك ايماعىن قۇرۋ جەردى پايدالانۋ ماسەلەلەرىندە مەملەكەتتىك باقىلاۋدى كۇشەيتەدى، اۋماقتى وڭالتۋدى، راديوەكولوگيالىق مونيتورينگتى ۇيىمداستىرۋدى جانە ەلدىڭ عىلىمي الەۋەتىن دامىتۋدى قامتاماسىز ەتەدى. ۋاكىلەتتى ۇيىم – ق ر ەنەرگەتيكا مينيسترلىگىنىڭ ۇلتتىق يادرولىق ورتالىعىنا فۋنكتسيالاردى زاڭنامالىق تۇرعىدا بەرۋ اسا ماڭىزدى بولىپ وتىر.

«زاڭدى قابىلداۋداعى ماڭىزدىلىعىنا توقتالساق، ونى جۇزەگە اسىرۋ ناتيجەسىندە يادرولىق سىناق پوليگونىنىڭ راديواكتيۆتى لاستانعان اۋماقتارى مەن لاستانباعان جەرلەرى اجىراتىلادى. لاستانباعان القاپتى اۋىل شارۋاشىلىعىنا ارنالعان جەرلەردىڭ ساناتىنا ەنگىزۋگە بولادى. بۇل تۇرعىدا 1 ميلليون گەكتار جەر ەسكەرىلگەن»، - دەدى سەناتور ولگا بۋلاۆكينا.