پرەزيدەنت وقۋ- اعارتۋ ءمينيسترى عاني بەيسەمبايەۆتى قابىلدادى
مەملەكەت باسشىسىنا مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ سالالارىن دامىتۋ ءۇشىن قابىلدانىپ جاتقان شارالار جونىندە مالىمەت بەرىلدى.
پرەزيدەنتكە بيىل قىركۇيەك ايىنان باستاپ مەكتەپكە دەيىنگى ءبىلىم بەرۋ مەكەمەلەرىندەگى پەداگوگتاردىڭ ەڭبەكاقىسى 30 پايىزعا وسەتىنى تۋرالى باياندالدى. جىل سوڭىنا دەيىن بالاباقشالاردا 81 مىڭ ورىن اشۋ جوسپارلانىپ وتىر. سونىمەن قاتار حالىقتىڭ الەۋمەتتىك وسال توپتارىنا جاتاتىن 98 مىڭ بالا تەگىن ىستىق تاماقپەن قامتاماسىز ەتىلەدى.
وقۋ- اعارتۋ ءمينيسترىنىڭ ايتۋىنشا، پەداگوگتاردى اتتەستاتتاۋ ءراسىمى جەتىلدىرىلىپ جاتىر. ەندى ولاردىڭ كاسىبي بىلىكتىلىگى ءپاندى قانشالىقتى جاقسى بىلەتىنىنە قاراي، ال جۇمىسىنىڭ ناتيجەسى ءبىلىم الۋشىلاردىڭ وقۋ جەتىستىكتەرى نەگىزىندە باعالانادى.
عاني بەيسەمبايەۆ بيىل 1-قىركۇيەكتەن باستاپ 1-4 سىنىپ وقۋشىلارى تولىقتاي تەگىن تاماقپەن قامتاماسىز ەتىلەتىنىن ايتتى. سونداي- اق ءبىلىم بەرۋ ۇيىمدارىن دابىل تۇيمەلەرىمەن، ليسەنزياسى بار كۇزەتپەن، تۋرنيكەتتەرمەن جانە جەدەل باسقارۋ ورتالىقتارىنا قوسىلعان بەينەباقىلاۋ جۇيەلەرىمەن جابدىقتاۋ جوسپارلانىپ وتىر.
سونىمەن قاتار مەملەكەت باسشىسىنا اۋىل مەكتەپتەرىن دامىتۋ تۇجىرىمداماسى تانىستىرىلدى. بيىل تەحنيكالىق جانە كاسىپتىك ءبىلىم الۋشى ستۋدەنتتەردىڭ 80 پايىزى تەگىن وقيدى. قىركۇيەك ايىنان باستاپ ولاردىڭ شاكىرتاقىسى 50 پايىزعا، ال كەلەسى جىلى 100 پايىزعا ارتادى. كاسىپورىندار كوللەدج تۇلەكتەرىن مىندەتتى تۇردە جۇمىسقا ورنالاستىرۋ شارتىمەن مامانداردى ماقساتتى دايارلاۋ ىسىنە العاش رەت اتسالىسىپ وتىر.
كەزدەسۋ سوڭىندا پرەزيدەنت قاسىم- جومارت توقايەۆ وقۋ- اعارتۋ مينيسترىنە ءبىلىم بەرۋ جۇيەسىن ودان ءارى جەتىلدىرۋ جانە بالالاردىڭ قاۋىپسىزدىگىن قامتاماسىز ەتۋ ىسىنە ۇدايى كوڭىل ءبولۋدى تاپسىردى.
