پرەزيدەنت رەفورمالار جونىندەگى جوعارى كەڭەستىڭ وتىرىسىن وتكىزدى

None
استانا. قازاقپارات - پرەزيدەنت قاسىم-جومارت توقايەۆ رەفورمالار جونىندەگى جوعارى كەڭەستىڭ وتىرىسىن وتكىزدى، دەپ حابارلايدى قازاقپارات.

ءىس-شارادا، ەڭ الدىمەن، ەلىمىزدىڭ الەۋمەتتىك-ەكونوميكالىق دامۋىنا قاتىستى نەگىزگى سىن-قاتەرلەر تالقىلاندى. جۇرگىزىلگەن تالداۋ ناتيجەلەرى جونىندە ستراتەگيالىق جوسپارلاۋ جانە رەفورمالار اگەنتتىگىنىڭ ءتوراعاسى اسەت ەرعاليەۆ بايانداما جاسادى.

photo

مەملەكەت باسشىسى باياندامانى تىڭداعان سوڭ ساياسي رەفورمالارمەن قاتار ەكونوميكالىق جانە قۇقىقتىق وزگەرىستەر دە جۇزەگە اسىرىلۋى قاجەت ەكەنىن ايتتى. ۇكىمەت پەن ستراتەگيالىق جوسپارلاۋ جانە رەفورمالار اگەنتتىگىنە قازاقستاننىڭ 2029-جىلعا دەيىنگى ۇلتتىق دامۋ جوسپارىن ازىرلەۋ بارىسىندا بۇگىنگى تالقىلاۋدىڭ ناتيجەلەرىن ەسكەرۋ جونىندە تاپسىرما بەرىلدى.

photo

جيىن بارىسىندا ەنەرگەتيكا سالاسى مەن ءتيىمدى تاريف ساياساتىن دامىتۋ جونىندەگى شارالارعا باسا ءمان بەرىلدى. بۇل باعىتتاعى اتقارىلىپ جاتقان جۇمىستار جونىندە ەنەرگەتيكا ءمينيسترى الماسادام ساتقاليەۆ جانە ۇلتتىق ەكونوميكا ءمينيسترى الىبەك قۋانتىروۆ باياندادى. مەملەكەت باسشىسى «ءتاريفتى ينۆەستيتسيالارعا ايىرباستاۋ» باعدارلاماسىن ءتيىمدى ءارى ۋاقىتىلى جۇزەگە اسىرۋ ۇكىمەتتىڭ باستى مىندەتى ەكەنىن ايتتى.

photo

پرەزيدەنت جىلۋ ەنەرگەتيكاسى جانە ەنەرگيا جۇيەسىنىڭ نىساندارى بىلىكتى كادرلارمەن قامتاماسىز ەتىلمەگەنىن كەلەسى وزەكتى ماسەلە رەتىندە اتاپ ءوتتى. كادر تاپشىلىعى ماسەلەسىن جەدەل شەشۋ جونىندە تاپسىرما بەرىلدى.

photo

جيىندا ۇلتتىق جوبالاردى ازىرلەۋ ماسەلەسى دە قاراستىرىلدى. قاسىم-جومارت توقايەۆ «جايلى مەكتەپ» جانە «اۋىلدىق دەنساۋلىق ساقتاۋدى جاڭعىرتۋ» ۇلتتىق جوبالارىن ۋاقىتىلى ءارى ساپالى جۇزەگە اسىرۋ قاجەتتىگىنە نازار اۋداردى.

photo

«قولجەتىمدى ينتەرنەت» جاڭا ۇلتتىق جوباسى تۋرالى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين باياندادى. مەملەكەت باسشىسى ءمينيستردىڭ بايانداماسىن تىڭداپ، اتالعان ۇلتتىق جوبا حالىقتى قولجەتىمدى جانە ساپالى ينتەرنەتپەن قامتاماسىز ەتۋ كەرەك ەكەنىن باسا ايتتى.

photo

بۇدان بولەك، جيىندا دەنساۋلىق ساقتاۋ سالاسىنىڭ ينفراقۇرىلىمىن كەشەندى تۇردە دامىتۋ ماسەلەسى تالقىلاندى. بۇل ماسەلە بويىنشا دەنساۋلىق ساقتاۋ ءمينيسترى اجار عينيات بايانداما جاسادى. قاسىم-جومارت توقايەۆ باعدارلامانى ءتيىمدى ىسكە اسىرۋ جانە وتاندىق ونىمدەردى كەڭىنەن قولدانۋ اسا ماڭىزدى ەكەنىن اتاپ ءوتتى.

photo

سوڭعى جاڭالىقتار