دەپۋتات قورعانىس جابدىقتارىن سىناقتان وتكىزەتىن زەرتحانالار قۇرۋدى ۇسىندى
بۇل تۋرالى سەناتور جاننا اسانوۆا ايتتى، دەپ حابارلايدى قازاقپارات ءتىلشىسى.
ونىڭ ايتۋىنشا، قازاقستاندا اتىس سىناقتارىن جۇرگىزۋگە ارنالعان تىركەلگەن زەرتحانا مەن وندىرىلگەن جابدىقتاردىڭ مەملەكەتتىك ستاندارتتار تالاپتارىنا سايكەستىگىن سەرتيفيكاتتاۋ جونىندەگى ورگاندار جوق.
ول ءوزىنىڭ دەپۋتاتتىق ساۋالىندا ءتيىستى زەرتحانانىڭ بولماۋىنا بايلانىستى اسكەري قىزمەتشىلەرگە جەكە قورعانىس قۇرالدارىن دايىنداۋ تالاپتارىن بەلگىلەيتىن ۇلتتىق ستاندارت پايدالانىلماي وتىرعانىن ايتتى. مەملەكەتتىك ورگاندار مەملەكەتتىك ساتىپ الۋ كەزىندە رەسەيلىك ۇقساس ستاندارتتى نازارعا الىپ كەلەدى.
سونىمەن قاتار، كۇش قۇرىلىمداردى قورعانىس قۇرالدارىمەن جابدىقتاۋ اسكەري قىزمەتشىلەردىڭ ءومىرى مەن دەنساۋلىعىن ساقتاۋ ماسەلەسىمەن تىكەلەي بايلانىستى. سەناتور وسى جاعدايدى جاقسارتۋ ءۇشىن ءبىرقاتار قادامدار ۇسىندى.
«وندىرىلەتىن جەكە قورعانىس قۇرالدارىنىڭ، ونىڭ ىشىندە وق وتپەيتىن ساۋىتتار مەن دۋلىعالار جانە قورعانىس قالقاندارىنىڭ جيىنتىعىن مەملەكەتتىك ستاندارتقا سايكەستىگىن راستايتىن سەنىمدى زەرتحانا مەن سەرتيفيكاتتاۋ ورگاندارىنىڭ ماسەلەسىن قاراستىرۋ قاجەت. سونداي-اق قازاقستاننىڭ وتاندىق وندىرۋشىلەرى اراسىندا جەكە قورعانىس قۇرالدارىن ساتىپ الۋ راسىمدەرىن وتكىزۋ مۇمكىندىگىنە تالداۋ جاساۋ قاجەت»، - دەدى جاننا اسانوۆا ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.
