جايىلىممەن قامتاماسىز ەتۋگە قاتىستى اۋىل اكىمدەرىنىڭ قۇزىرەتى كەڭەيتىلمەك

None
استانا. قازاقپارات - بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جايىلىمداردى پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى، دەپ حابارلايدى قازاقپارات ءتىلشىسى.

«اۋىل شارۋاشىلىعى مينيسترلىگىنىڭ اقپاراتى بويىنشا جايىلىم تاپشىلىعى 30 ميلليون گەكتارعا جۋىق. ودان باسقا، اۋىل ماڭىنداعى جايىلىمدىق جەرلەردىڭ 90 پايىزعا جۋىعى شامادان تىس پايدالانۋىنا بايلانىستى دەگراداتسياعا ۇشىراپ وتىر. بۇل رەتتە، 2017-جىلى پارلامەنت دەپۋتاتتارى باستاماسى بويىنشا قابىلدانعان «جايىلىمدار تۋرالى» زاڭ ءوز ماقساتىنا تولىقتاي جەتە الماعانىن اتاپ وتكەن ءجون. وسىعان بايلانىستى، VII شاقىرىلىمنىڭ پارلامەنت دەپۋتاتتارى باستاماسىمەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جايىلىمداردى پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ازىرلەندى. زاڭ جوباسىنىڭ نەگىزگى ماقساتى - جايىلىم ماسەلەلەرى بويىنشا قولدانىستاعى زاڭ نورمالارىن جەتىلدىرۋ. بۇل تۇرعىدا 4 زاڭعا وزگەرىس پەن تولىقتىرۋ ەسكەرىلگەن»، - دەدى سەنات دەپۋتاتى سۇلتان دۇيسەمبينوۆ.

سەناتور ءتيىستى دەڭگەيدە پايدانىلماي جاتقان جايىلىمدار قانداي جاعدايدا مەملەكەتكە قايتارىلاتىنىن ايتتى.

«جەر كودەكسىنە ەنگىزىلگەن وزگەرىستەرگە جەكە توقتالىپ وتەمىن. كودەكسكە سايكەس، ەگەر دە جايىلىمنىڭ جالپى الاڭىنا تۇسەتىن جۇكتەمە نورماسىنىڭ جيىرما پايىزىنان از بولعان جاعدايدا، ارتىق جايىلىم مەملەكەتكە قايتارىلۋعا جاتادى. ال، جايىلىمنىڭ جالپى الاڭىنا تۇسەتىن جۇكتەمە نورماسىنىڭ ەلۋ پايىزىنان از بولعان جاعدايدا، ارتىق جايىلىم قايتارىلادى. ەنگىزىلىپ وتىرعان نورما جايىلىمداردى ءتيىمدى پايدالانۋعا باعىتتالعان»، - دەدى س. دۇيسەمبينوۆ.

ونىڭ ايتۋىنشا، ورمان كودەكسىنە سايكەس، مەملەكەتتىك ورمان قورىنداعى جايىلىمداردا مال جايۋعا رۇقسات بەرىلگەن. ءبىراق ورمان قورى جەرىندەگى جايىلىمدار تۋرالى اقپارات جەرگىلىكتى اتقارۋشى ورگاندارعا بەرىلمەيدى. وسىعان بايلانىستى، زاڭ جوباسىندا مەملەكەتتىك ورمان پايدالانۋشىلار ورمان قورىنداعى مال جايۋعا رۇقسات بەرىلگەن جايىلىمدار تۋرالى اقپاراتتى جىل سايىن (قاراشا ايىندا) اۋداندىق اتقارۋشى ورگاندارعا بەرۋى تۋرالى مىندەتتەمە ەنگىزىلگەن.

«جايىلىمدار تۋرالى» زاڭعا ەنگىزىلىپ وتىرعان نەگىزگى وزگەرىستەر:

- «قوعامدىق جايىلىم» تۋرالى جاڭا ۇعىم ەنگىزىلدى. بۇل رەتتە، قوعامدىق جايىلىمدارعا جەرگىلىكتى حالىقتىڭ مال جاياتىن جەرلەرى جانە وسى ماقسات ءۇشىن ارنايى رەزەرۆكە الىنعان جەرلەر جاتادى. قوعامدىق جايىلىمداردى باسقا ماقسات ءۇشىن پايدالانۋعا نەمەسە ولاردى الۋعا زاڭمەن تىيىم سالىنادى.

- «قوعامدىق جايىلىم» كولەمىن ۇلعايتۋ ماقساتىندا، اۋىلدىق ەلدى مەكەن شەكاراسىنان تىس ورنالاسقان جايىلىمداردى اۋىل اكىمدەرىنىڭ قۇزىرەتىنە بەرۋ تۋرالى نورما ۇسىنىلىپ وتىر. قازىرگە كەزدە ولار اۋداندىق اتقارۋشى ورگاننىڭ قۇزىرەتىندە. بۇل نورمانىڭ باستى ماقساتى - جەكە مال جايۋ ءۇشىن جايىلىممەن قامتاماسىز ەتۋگە قاتىستى اۋىل اكىمدەرىنىڭ قۇزىرەتتەرىن كەڭەيتۋ جانە جايىلىمداردى پايدالانۋ تۋرالى جوسپاردىڭ كەشەندىلىگىن قامتاماسىز ەتۋ.

- جايىلىمداردى پايدالانۋ تۋرالى جوسپار ەندى 5جىلعا ارنالىپ جاسالادى. قازىرگى كەزدە، جايىلىم جوسپارلارى ۇزاق مەرزىمدى (2 جىلعا دەيىن) جانە قىسقا مەرزىمدى (1 جىلعا دەيىن) تارتىپتە قۇرىلىپ وتىر؛

- جايىلىمداردى قورعاۋ، ولاردى قالپىنا كەلتىرۋ تۋرالى جاڭا باپتار ەنگىزىلىپ وتىر. قولدانىستاعى جەر جانە جايىلىم تۋرالى زاڭنامالاردا مۇنداي نورما جوق.

سوڭعى جاڭالىقتار