ەرىكتىلەردى بارىنشا قولدايمىن - قاسىم-جومارت توقايەۆ
استانا. قازاقپارات - قازاقستاندا ەرىكتىلەر قىزمەتى جان-جاقتى دامىپ كەلە جاتىر. بۇل تۋرالى حالىقارالىق ۆولونتەرلەر فورۋمىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«بۇگىنگى فورۋمعا ەلىمىزدىڭ ءار تۇكپىرىنەن جانە شەت ەلدەردەن ەرىكتىلەر ارنايى كەلىپ وتىر. حالىقارالىق ۇيىمداردىڭ وكىلدەرى، مارتەبەلى مەيماندار قاتىسىپ وتىر. بارىڭىزگە شىنايى ريزاشىلىعىمدى بىلدىرەمىن. كەشەدەن بەرى وزەكتى ماسەلەلەر تالقىلاندى. جيىنعا قاتىسۋشىلار وي- پىكىرلەرىن ورتاعا سالدى، ۇتىمدى ۇسىنىستار ايتتى. ءتيىمدى جوبالارىن تانىستىرىپ، تاجىريبە ءبولىستى. مۇنىڭ ءبارى يگى ىستەردى جالعاستىرۋعا زور مۇمكىندىك بەرەدى»، - دەدى پرەزيدەنت.
مەملەكەت باسشىسى قازاقستاندا ەرىكتىلەر قىزمەتى جان- جاقتى دامىپ كەلە جاتقانىن باسا ايتتى.
«بۇعان مەملەكەت تاراپىنان قاجەتتى جاعداي جاسالىپ جاتىر. مەن ءوزىم ەرىكتىلەردى بارىنشا قولدايمىن. سىزدەردىڭ تاباندى جۇمىستارىڭىزدى جوعارى باعالايمىن. وسى سالاداعى بارلىق باستامالاردى قولدايمىن»، - دەدى قاسىم-جومارت توقايەۆ.
