قازاقستان باتىس ەلدەرى جاريالاعان سانكسيا تالاپتارىن تولىق ساقتاپ وتىر - توقايەۆ
«ءبىز، ەڭ الدىمەن، د س ۇ ەرەجەلەرى مەن نورمالارىن باسشىلىققا الامىز. سونداي-اق حالىقارالىق نارىقتا قابىلدانعان بارلىق ەرەجەنى ساقتايمىز. ال ەكى ماقساتتا قولدانىلاتىن تاۋارلاردىڭ رەسەيگە ەكسپورتى تۋرالى ايتار بولساق، بۇل مۇلدەم شىندىققا جاناسپايدى. ويتكەنى، جاڭا عانا ايتقانىمداي، ءبىز د س ۇ ەرەجەسىن جانە ەۋروپالىق وداق جاريالاعان بارلىق سانكسيا تالاپتارىن ساقتايمىز. ايتسە دە، رەسەيمەن ساۋدا-ساتتىق جاسايمىز. بىلتىر ەكى ەل اراسىنداعى تاۋار اينالىمىنىڭ كولەمى 28 ميلليارد دوللارعا جەتتى. بۇل قولدانىستاعى حالىقارالىق ستاندارتتارعا تولىق ساي كەلەدى»، - دەپ اتاپ ءوتتى مەملەكەت باسشىسى گەرمانيا پرەزيدەنتىمەن كەزدەسۋدەن كەيىنگى ب ا ق وكىلدەرىنە ارنالعان بريفينگىدە.
پرەزيدەنت سونداي-اق ەۋرووداقتىڭ ورتالىق ازيا ەلدەرىمەن بەلسەندى ىنتىماقتاستىعىن اتاپ ءوتتى.
«ەۋروپالىق وداق - قازاقستان ءۇشىن اسا ماڭىزدى ءارى ەلىمىزدىڭ ەڭ ءىرى ساۋدا سەرىكتەسى. ءبىز ءوزارا ىنتىماقتاستىعىمىزدى نىعايتۋ ءۇشىن ەۋروپالىق ينستيتۋتتارمەن تۇراقتى جۇمىس ىستەيمىز. قازاقستان - «ورتالىق ازيا +ە و» فورماتىنىڭ بەلسەندى سەرىكتەسى. وسى فورماتتاعى سوڭعى كەزدەسۋىمىز قىرعىزستاندا ءوتتى. جۋىردا ءوزارا ىنتىماقتاستىعىمىزعا، سونداي-اق گەوساياسي جاعدايعا قاتىستى وزەكتى ماسەلەلەردى تالقىلادىق. ورتالىق ازيا حالىقارالىق ارەنادا ىقپالدى ايماققا اينالىپ كەلەدى»، - دەدى قاسىم-جومارت توقايەۆ.