قاسىم- جومارت توقايەۆ نەمىس كومپانيالارىن قازاقستانعا ينۆەستيتسيا سالۋعا شاقىردى
پرەزيدەنتتەر قازاق- گەرمان ستراتەگيالىق سەرىكتەستىگىنىڭ جاي-كۇيى مەن دامۋ پەرسپەكتيۆالارىن تالقىلادى. ساياسي ديالوگتى نىعايتۋعا، ساۋدا، ەكونوميكا، ينۆەستيتسيا، ەنەرگەتيكا، كولىك جانە لوگيستيكا سالالارىنداعى ىنتىماقتاستىقتى تەرەڭدەتۋگە ەرەكشە نازار اۋدارىلدى.
سونداي- اق ترانسكاسپي حالىقارالىق كولىك باعىتىن دامىتۋ اياسىندا ءوزارا ءىس- ارەكەتتى جانداندىرۋ، مۇناي جانە گاز، جاسىل ەنەرگەتيكا، ونەركاسىپ سالالارىنداعى ءوزارا ءتيىمدى ىنتىماقتاستىقتى كەڭەيتۋ ماڭىزدى ەكەنى اتاپ ءوتىلدى.
قاسىم- جومارت توقايەۆ پەن فرانك- ۆالتەر شتاينمايەر حالىقارالىق جانە وڭىرلىك كۇن تارتىبىندەگى وزەكتى ماسەلەلەر جونىندە پىكىر الماستى.
تەت- ا- تەت فورماتىنداعى كەلىسسوزدەر دوستىق رۋحىندا ءوتتى جانە كونسترۋكتيۆتى ءارى مازمۇندى بولدى. ەكىجاقتى ەكونوميكالىق كۇن ءتارتىبىنىڭ ءبىرقاتار باعىتى بويىنشا ىنتىماقتاستىقتى ارتتىرۋ تۋرالى ۋاعدالاستىققا قول جەتكىزىلدى.
مەملەكەت باسشىسى قاسىم- جومارت توقايەۆ نەمىس كومپانيالارىن قازاقستانعا ينۆەستيتسيا سالۋعا شاقىردى.
«ءبىزدىڭ ىنتىماقتاستىعىمىزدىڭ نەگىزگى سەكتورى - مۇناي مەن گاز، ءوندىرىس، ماشينا جاساۋ، كولىك، لوگيستيكا، جاڭاراتىن ەنەرگيا، اۋىل شارۋاشىلىعى. قانشا سالا بولسا، سونشا سەكتور بار. ءبىز گەرمانيانىڭ جاڭا كومپانيالارىن قازاقستانداعى جاسىل وسىمگە، يننوۆاتسياعا، سۋتەگىنە، جاسىل ەنەرگەتيكا وندىرىسىنە ينۆەستيتسيا سالۋعا شاقىرامىز»، - دەدى قاسىم-جومارت توقايەۆ ەلىمىزگە مەملەكەتتىك ساپارمەن كەلگەن گەرمانيانىڭ فەدەرالدى پرەزيدەنتى فرانك- ۆالتەر شتاينمايەرمەن كەڭەيتىلگەن قۇرامداعى كەلىسسوز بارىسىندا.
مەملەكەت باسشىسى بۇگىن ەلوردادا وتەتىن بىرلەسكەن بيزنەسكە ۇلكەن ءۇمىت ارتاتىندىعىن باسا ايتتى.
«بۇگىن تۇستەن كەيىن وتەتىن قازاقستان- گەرمان ينۆەستيتسيالىق فورۋمىنان زور ءۇمىتىمىز بار. مەنىڭشە، بۇل فورۋم مەن ونىڭ اياسىندا ۇكىمەتتىك ءارى بيزنەس دەڭگەيىندە قول جەتكىزىلەتىن كەلىسىمدەر ساۋدا جانە ينۆەستيتسيالىق ىنتىماقتاستىعىمىزدى نىعايتۋعا تىڭ سەرپىن بەرەدى دەپ ويلايمىن»، - دەدى پرەزيدەنت.
