بانك ليتسەنزياسىنان ايىرىلسا، دەپوزيتتەگى اقشانى قالاي قايتارۋعا بولادى

None
استانا. قازاقپارات - اقشانى قانداي دا ءبىر بانكتە دەپوزيت تۇرىندە ساقتايتىندار از ەمەس. بۇل جيناققا جۇرەتىن جىلدىق سىياقى ەسەبىنەن قارجىنى ەكى ەسەلەۋدىڭ بىرەگەي قۇرالىنا اينالدى.

الايدا، ءتۇرلى جاعدايعا بايلانىستى دەپوزيت ساقتالعان بانك ليتسەنزياسىنان ايىرىلۋى ىقتيمال. سول كەزدە سالىمشىلاردىڭ بويىن «قارجىمنان ايىرىلىپ قالامىن با؟» دەگەن ۇرەي بيلەيدى. ءبىراق، بۇل رەتتە قازاقستاننىڭ دەپوزيتتەرگە كەپىلدىك بەرۋ قورى اقشانىڭ يەسىنە قايتارىلۋىن قامتاماسىز ەتەدى. وسى ورايدا، قازاقپارات ءتىلشىسى بانك ليتسەنزياسىنان ايىرىلعان جاعدايدا قور ارقىلى دەپوزيت سوماسى مەن وعان ەسەپتەلگەن سىياقىنى قالاي قايتارۋعا بولاتىنىن انىقتاپ كوردى.

دەپوزيت ساقتالعان بانك ليتسەنزياسىنان ايىرىلسا نە ىستەۋ قاجەت؟

ەگەر بانك بارلىق وپەراتسيالاردى جۇرگىزۋ ليتسەنزياسىنان ايىرىلسا، وندا بىردەن ۇرەيگە بەرىلۋدىڭ قاجەتى جوق. ويتكەنى، جيناقتارىڭىزدىڭ ساقتالۋىنا قازاقستاننىڭ دەپوزيتتەرگە كەپىلدىك بەرۋ قورى (ق د ك ب ق) جاۋاپتى. ماسەلەن، اتالعان قور قۇرىلعاننان باستاپ بۇگىنگە دەيىن ليتسەنزياسى جويىلعان 11 بانكتىڭ دەپوزيتورلارىنا كەپىلدى وتەماقى تولەدى.

قور قانداي دەپوزيتتەرگە كەپىلدىك بەرەدى؟

قور كەپىلدىكتەرى جەكە تۇلعالاردىڭ بارلىق وتاندىق بانكتەردەگى جانە (يسلام بانكتەرى مەن ولاردىڭ فيليالدارىن قوسپاعاندا) شەتەلدىك بانكتەردىڭ فيليالدارىندا جيناقتالعان دەپوزيتتەرىنە جۇرەدى. ونىڭ ىشىندە بۇل تەتىك قازىرگى جانە كارتا شوتتارداعى اقشالارعا قاتىستى دا قولدانىلادى.

بانك ليتسەنزياسىنان ايىرىلعان جاعدايدا قازاقستاننىڭ دەپوزيتتەرگە كەپىلدىك بەرۋ قورى ونىڭ سالىمشىلارىنا كەپىلدى وتەم تولەيدى. بۇل ورايدا سالىمنىڭ ءتۇرى مەن ۆاليۋتاسىنا قاراي بەكىتىلگەن شەكتى كەپىلدىك مولشەرى، سونداي-اق جيناققا ەسەپتەلگەن سىياقى مولشەرلەمەسى دە ەسكەرىلەدى.

كەپىلدىكتىڭ ەڭ كوپ مولشەرى زاڭنامامەن بەكىتىلگەن جانە ونىڭ سوماسى سالىمنىڭ ءتۇرى مەن ۆاليۋتاسىنا قاراي ءارتۇرلى بولادى.

اتاپ ايتقاندا، بەلىگىلەنگەن ليميت شەگىندەگى مىنا مولشەردە وتەماقى تولەنەدى:

- تەڭگەمەن ساقتالعان دەپوزيتتەر بويىنشا - 20 ميلليون تەڭگەدەن اسپايدى؛

- تەڭگەمەن ساقتالعان باسقا دەپوزيتتەر، بانك كارتاسىنداعى اقشا مەن شوتتارداعى جيناق بويىنشا - 10 ميلليون تەڭگەدەن اسپايدى؛

- شەتەل ۆاليۋتاسىندا ساقتالعان بارلىق دەپوزيتتەر، بانك كارتاسىنداعى اقشا مەن شوتتارداعى جيناق بويىنشا - 5 ميلليون تەڭگەدەن اسپايدى.

وتەمدى ەسەپتەۋ بارىسىندا بانك ليتسەنزياسىنان ايىرىلعان كۇنگە قاراي ەسەپتەلگەن سىياقى دا ەسكەرىلەدى.

مىنا سىلتەمەگە ءوتىپ، بۇل پروتسەدۋرا تۋرالى تولىق اقپارات الۋعا بولادى.

تولەمدەر قاشان باستالادى؟

كەپىلدى وتەم بانك ليتسەنزياسىنان ايىرىلعان كۇننەن باستاپ، 35 جۇمىس كۇنى ىشىندە تولەنەدى. الايدا، ءىس جۇزىندە بۇدان دا ەرتە بەرىلەدى. مىسالى، 2020-2021-جىلدارداعى ساقتاندىرۋ جاعدايلارى بويىنشا تاراتىلىپ جاتقان Tengri Bank ، Asia Credit Bank جانە «Capital Bank Kazakhstan» بانكتەرىنىڭ سالىمشىلارى وزدەرىنىڭ قاراجاتىن 6-8 كۇندە الدى.

قور سالىمشىلارعا تولەمنىڭ باستالۋى تۋرالى الدىن الا حابارلاما جولدايدى. ايتالىق، زاڭناماعا سايكەس، بانك ليتسەنزياسى جويىلعان كۇننەن باستاپ، 30 جۇمىس كۇنى ىشىندە قازاقستاننىڭ دەپوزيتتەرگە كەپىلدىك بەرۋ قورى رەسمي ب ا ق- تا حابارلاندىرۋ جاريالايدى. وندا تولەمنىڭ قاشان باستالاتىنى، مەرزىمى مەن ورىنى، وسى تولەمدى جۇزەگە اسىراتىن اگەنت بانكتەردىڭ اتاۋى كورسەتىلەدى. سونىمەن قاتار، مۇنداي حابارلاما قدكبق، قارجى نارىعىن رەتتەۋ جانە دامىتۋ اگەنتتىگى جانە اگەنت بانكتەردىڭ سايتارىندا ورنالاستىرىلادى.

ق د ك ب ق مەن اگەنت بانكتەر حابارلاندىرۋ جاريالانعان كۇننەن باستاپ، 5 جۇمىس كۇنى ىشىندە وتىنىشتەر قابىلداپ، تولەۋدەردى اۋدارا باستايدى.

سالىمشىلار قاي ۋاقىتتا ءوتىنىش بەرە الادى؟

سالىمشى تولەم باستالعان كۇننەن باستاپ، 1 -جىل ىشىندە قدكبق نەمەسە اگەنت بانككە وتەم الۋعا ءوتىنىش پەن قاجەتتى راستاۋشى قۇجاتتاردى تاپسىرا الادى. ولاردى قاراپ، قاراجاتتى اۋدارۋ تۋرالى شەشىم قابىلداۋ قىزمەتى 5 كۇننەن اسپايدى.

ايتا كەتەيىك، قازاقستاننىڭ دەپوزيتتەرگە كەپىلدىك بەرۋ قورى تولەم مەرزىمىنىڭ اياقتالاتىن وعان جارتى جىل جانە ەكىنشى رەت 30 كۇن قالعاندا حاباردار ەتەدى. ول مالىمەتتەر رەسمي باق بەتتەرىندە جانە بانكتىڭ رەسمي سايتى مەن الەۋمەتتىك جەلىلەردەگى پاراقشالارىندا جاريالانادى.

تولەم مەرزىمىن وتكىزىپ العان سالىمشى قايدا جۇگىنەدى؟

تولەم مەرزىمى اياقتالعان سوڭ، قدكبق سالىمشىلاردىڭ تالاپ ەتپەگەن اقشالارىن ولاردىڭ ءبىرىڭعاي جيناقتاۋشى زەينەتاقى قورىندا (ب ج ز ق) اشىلعان جەكە زەينەتاقى شوتتارىنا ەرىكتى زەينەتاقى جارنالارى رەتىندە اۋدارادى. بۇل رەتتە اقشانى شوتقا جىبەرۋ سالىمشىلاردىڭ دەرەكتەرىن سالىستىرىپ، تەكسەرۋ ارقىلى جۇزەگە اسادى.

ەگەر سالىمشى تولەم مەرزىمىن دالەلدى سەبەپتەر بويىنشا وتكىزىپ العان بولسا، ءتىپتى ونىڭ اقشاسى بجزق- عا اۋدارىلىپ كەتكەن كۇننىڭ وزىندە سول وتەم اقشانى الۋ جونىندە قورعا جازباشا ءوتىنىش بەرۋگە قۇقىعى بار.

زاڭنامامەن بەكىتىلگەن دالەلدى سەبەپتەرگە مىنالار ەنەدى:

- اسكەري قىزمەتكە كىرۋ؛

- قازاقستان رەسپۋبليكاسىنان تىس جەردە بولۋ؛

- دەپوزيتوردىڭ مۇراسىن قابىلداۋ جانە مۇرانى يەمدەنۋگە نەمەسە اشۋعا بايلانىستى وزگە دە سەبەپتەر؛

- باس بوستاندىعىنان ايىرۋ ورىندارىندا بولۋ؛

- سوت انىقتاعان وزگە دە ءمان-جايلار.

جوعارىدا اتالعان كەز كەلگەن سەبەپ ءتيىستى قۇجاتتارمەن راستالۋى ءتيىس. دالەلدى سەبەپتەر بويىنشا تولەم الۋ جونىندەگى ءوتىنىش ق د ك ب ق- عا مىنا مەرزىم ىشىندە جولدانۋى ءتيىس:

- بانك تۇپكىلىكتى تاراتىلعانعا دەيىن؛

- زەينەتاقىمەن قامسىزداندىرۋ تۋرالى زاڭناماعا سايكەس، ب ج ز ق- دا ەرىكتى زەينەتاقى جارنالارى ەسەبىنەن زەينەتاقى تولەمدەرىن الۋ قۇقىعى تۋىنداعانعا دەيىن بەرىلۋى ءتيىس.

سوڭعى جاڭالىقتار