مينيستر ورالوۆ تيكتوك باسشىلىعىمەن قازاق ءتىلدى كونتەنتتى دامىتۋدى تالقىلادى
قۇرامىندا كومپانيانىڭ وڭىرلىك باسشىلارى مەن مەنەدجەرلەرى بار شەتەلدىك دەلەگاتسيانى TikTok-تىڭ بيلىك ورگاندارىمەن ءوزارا ءىس- قيمىل جونىندەگى ۆيتسە- پرەزيدەنتى تاكۋيا ياماگۋچي باستاپ كەلگەن.
تاراپتار قازاق تىلىندەگى كونتەنتتى دامىتۋ جانە قازاقستاندىق سپورتتى، مادەنيەت پەن تۋريزمدى ىلگەرىلەتۋ ماقساتىندا ەكىجاقتى ىنتىماقتاستىقتى تالقىلادى.
ءبىز ءۇشىن مەملەكەتتىك تىلدە مادەنيەت، سپورت جانە تۋريزم بولىگىندە كونتەنت دايىنداۋ باسىم باعىت سانالادى. مەن، الەۋمەتتىك جەلىلەردىڭ بەلسەندى قولدانۋشىسى رەتىندە، اقپاراتتى جەتكىزۋ ءۇشىن ءارتۇرلى قۇرالداردى قولدانۋ قانشالىقتى ماڭىزدى ەكەنىن تۇسىنەمىن. Instagram, Facebook الەۋمەتتىك جەلىلەرىندەگى پاراقشالارىمدى ءوزىم جۇرگىزەمىن، سونىمەن قاتار جاقىندا Telegram-دا كانال اشتىم. بۇل اقپاراتتى جەدەل جەتكىزۋگە جانە ۋاقىت كوشىنە ىلەسىپ وتىرۋعا مۇمكىندىك بەرەدى. TikTok قازاقستاندا تەز تانىلدى. ەلىمىزدەگى ميلليونداعان ادام وسى الەۋمەتتىك جەلىدە، سونىڭ ىشىندە قازاق تىلىندە ۆيدەوروليكتەردى قاراپ، جوبالار جاساپ، اككاۋنتتارىن جۇرگىزىپ وتىر. ءبىز ءوز تاراپىمىزدان كىتاپتار، فيلمدەر، سپەكتاكلدەر جانە تاعى باسقاسى بولسىن، قازاق ءتىلدى كونتەنتتىڭ ۇلەسىن ارتتىرۋ باعىتىندا جۇمىس ىستەپ جاتىرمىز، - دەدى اسحات ورالوۆ.
قوناقتار ءوز كەزەگىندە قازاقستاننىڭ مول الەۋەتىن اتاپ ءوتىپ، الداعى جوسپارلارى تۋرالى ايتىپ بەردى.
ءبىز باسقا ەلدەردەگى مينيسترلىكتەرمەن ءوزارا ءىس- قيمىل جاسايمىز جانە قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ اشىقتىعىنا قۋانىشتىمىز، الداعى ۋاقىتتا مينيسترلىكتىڭ جۇمىسىن كورسەتۋگە، اۋديتوريانى جوبالارعا تارتۋعا دايىنبىز. بىزگە قازاقستاندىق نارىق وتە تارتىمدى جانە قازاق تىلىندەگى كونتەنتتى قولدايمىز. TikTok - قازاق مادەنيەتىن بۇكىل الەمگە ناسيحاتتاۋ قۇرالى بولا الادى. كونتەنت قارالىمى كوبىنەسە ەل حالقىنىڭ سانىنان اسىپ تۇسەدى، ال قازاقستاندىق اۆتورلاردىڭ ميللياردتاعان اۋديتورياعا شىعۋ مۇمكىندىگى بار. سوندىقتان ءبىز ىنتىماقتاستىقتى نىعايتۋعا نيەتتىمىز. اتاپ ايتقاندا، مىسالى، جازدا #كىتاپ توك چەللەندجىنىڭ ەكىنشى تولقىنىن ىسكە قوسۋعا بولادى. سونداي- اق ءبىز كونتەنت وندىرۋگە ارنالعان ترەنينگتەردى وتكىزۋگە دايىنبىز، - دەدى TikTok-تىڭ بيلىك ورگاندارىمەن ءوزارا ءىس- قيمىل جونىندەگى ۆيتسە- پرەزيدەنتى تاكۋيا ياماگۋچي.
ەستەرىڭىزگە سالا كەتەيىك، ق ر م س م مەن TikTok باسپا ءسوز قىزمەتى بىرلەسكەن بىرنەشە جوبانى جۇزەگە اسىردى. اتاپ ايتقاندا، #ناۋرىز2023 ونلاين- فەستيۆالى اياسىندا ۆيدەوروليكتەر 200 ميلليونعا جۋىق قارالىم جينادى، ال #BookTok جالپى الەمدىك ترەندى اياسىندا #كىتاپ توك اكسياسى - 40 ميلليون مارتە قارالدى.
وتكەن جىلى «Kazakh Tourism ۇك» ا ق جانە TikTok كاسىبي گيدتەردەن تىكەلەي ەفيردە ۆيرتۋالدى ەكسكۋرسيالار سەرياسىنان باستالعان #TravelKazakhstan جوباسىن ىسكە قوستى. قازىر وسى حەشتەگ بويىنشا روليكتەر 23,1 ميلليون قارالىم جيناپ وتىر.
