انتيكور الماتى وبلىسىنىڭ باسشىلارىنا نەلىكتەن كونۆەرت تاراتتى - اكىم جاعدايدى ءتۇسىندىردى

استانا. قازاقپارات - الماتى وبلىسىنىڭ اكىمى مارات سۇلتانعازيەۆ سىبايلاس جەمقورلىققا قارسى ءىس- قيمىل اگەنتتىگىنىڭ الماتى وبلىسى بويىنشا دەپارتامەنتى جىبەرگەن حاتتار بويىنشا پىكىر ءبىلدىردى، دەپ حابارلايدى قازاقپارات ءتىلشىسى.

«جالپى العاندا باقىلاۋشى ورگانداردىڭ تەكسەرۋلەرىنە كەلەتىن بولساق، ول جوسپارلانادى جانە كەيبىرى ىرىكتەۋدەن ءوتىپ، تىركەلەدى. بۇل جەردە بۇگىن بولعان جاعدايدى كەلەسى كۇنگى وقيعامەن بايلانىستىرۋدىڭ ءمانى جوق. باقىلاۋشى ورگانداردىڭ تەكسەرۋ جۇرگىزۋ تۋرالى حابارلاماسىنىڭ «التىن وردا» بازارى ديرەكتورى ورىنباسارىنىڭ ۇستالۋىمەن بايلانىسى جوق. ۇستالۋعا كەلسەك، قۇقىق قورعاۋ ورگاندارى قاماۋعا الدى، مەنىڭ تۇسىنۋىمشە، تەرگەۋ جۇرگىزىلىپ جاتىر»، - دەدى مارات سۇلتانعازييەۆ ورتالىق كوممۋنيكاتسيالار قىزمەتىنىڭ كوشپەلى باسپا ءسوز ءماسليحاتىندا.

ودان بولەك، وبلىس باسشىسى «التىن وردا» بازارىنداعى جاعدايعا توقتالىپ ءوتتى.

«التىن وردا» بازارىنا كەلسەك، تەكسەرۋ ناتيجەسى كورسەتەدى. تەكسەرۋ وتكەن جىلى باستالىپ، باس پروكۋراتۋرا ءبىرقاتار بۇزۋشىلىقتى انىقتالدى. ۇكىمەت دەڭگەيىندە كەڭەس وتكىزىلدى. ويتكەنى، «التىن وردا» بازارىندا تاۋارلار ءىرى كولەمدە جانە ونداعى باعا الماتىدا عانا ەمەس، قازاقستان بويىنشا قالىپتاسادى. وسىعان بايلانىستى تەكسەرۋ باستالدى. ولاردىڭ قاتارىندا سالىق ورگاندارى، مونوپولياعا قارسى اگەنتتىك، كوشى- قون پوليتسياسى جانە باسقا دا باقىلاۋشى ورگاندار بار» ، - دەيدى ول.

ەسكە سالا كەتەيىك، 7-ماۋسىم كۇنى انتيكوردىڭ الماتى وبلىسىنىڭ بارلىق دەڭگەيدەگى باسشىلارىنا كونۆەرت تاراتىپ جاتقانى تۋرالى حابارلاعان ەدىك.