انام قازاقستاندا التى جىل ءومىر ءسۇردى - اۋىل شارۋاشىلىعى ماسەلەلەرى جونىندەگى ەۋروكوميسسار

None
Фото: akorda.kz
استانا. قازاقپارات - مەملەكەت باسشىسى قاسىم- جومارت توقايەۆ اۋىل شارۋاشىلىعى ماسەلەلەرى جونىندەگى ەۋروكوميسسار يانۋش ۆويچەحوۆسكيمەن كەزدەستى. قازاقپارات بۇل تۋرالى اقورداعا سىلتەمە جاساپ حابارلايدى.

پرەزيدەنت قاسىم- جومارت توقايەۆ يانۋش ۆويچەحوۆسكيگە استانا حالىقارالىق فورۋمىنا سپيكەر رەتىندە قاتىسقانى ءۇشىن العىس ايتتى.

ءبىزدىڭ ەلىمىزبەن ايرىقشا بايلانىسىڭىز بار ەكەنىن ءبىلىپ، تاڭعالدىم. قادىرلى اناڭىز ەكىنشى دۇنيەجۇزىلىك سوعىس جىلدارى قازاقستاندا ءومىر ءسۇرىپتى. سوندىقتان ءسىزدىڭ ساپارىڭىزعا وتە قۋانىشتىمىز. ەلىمىزدە پولياك دياسپوراسى تۇرادى. ءارى ءبىزدىڭ ورتاق مادەني مۇرامىز بار. بەنەديكت پولياك، ادولف يانۋشكيەۆيچ، گۋستاۆ زەلينسكيي، الەكساندر زاتايەۆيچ سەكىلدى تۇلعالار قازاقستاننىڭ مادەني دامۋىنا ەلەۋلى ۇلەس قوستى، - دەدى مەملەكەت باسشىسى.

كەزدەسۋ بارىسىندا قاسىم- جومارت توقايەۆ قازاقستاننىڭ ءىرى ساۋدا سەرىكتەسى سانالاتىن ەۋروپالىق وداقپەن ىنتىماقتاستىقتىڭ ستراتەگيالىق سيپاتىنا نازار اۋداردى.

جاقىندا قىرعىزستاندا «ورتالىق ازيا - ەۋروپالىق وداق» جاڭا فورماتىندا كەزدەسۋ وتكىزدىك. بۇعان دەيىن استانادا ءبىرىنشى كەزدەسۋ بولعان. سوندىقتان تىعىز قارىم- قاتىناس جاساۋ جونىندەگى نيەتىمىز بەن ۇمتىلىسىمىزدى كورسەتۋ ءۇشىن جوعارى دەڭگەيدەگى وسىنداي كەزدەسۋلەردى وتكىزىپ تۇرۋ كەرەك. بيىل جىل باسىندا ەۋروپالىق وداقپەن ديپلوماتيالىق قارىم- قاتىناس ورناتقانىمىزعا 30 جىل تولدى. ەۋروپالىق وداقپەن ءوزارا بايلانىسىمىزدى نىعايتۋعا مول مۇمكىندىك بار، - دەدى پرەزيدەنت.

قاسىم- جومارت توقايەۆ ەۋروكوميسسارعا قازاقستاندا جۇرگىزىلىپ جاتقان رەفورمالار، سونداي- اق دەموكراتيانى دامىتۋعا، ادام قۇقىقتارىن قورعاۋعا جانە قوعامدا زاڭ ۇستەمدىگىن ورناتۋعا سەپتىگىن تيگىزەتىن وزەرىستەر تۋرالى ايتتى.

سونىمەن قاتار مەملەكەت باسشىسى قازاقستاننىڭ ەۋروپالىق وداقپەن اۋىل شارۋاشىلىعى سالاسىنداعى ىنتىماقتاستىقتى كەڭەيتۋ ءۇشىن زور الەۋەتى بار ەكەنىنە توقتالدى. ونىڭ ايتۋىنشا، ەلىمىز ءداندى جانە مايلى داقىلداردى، سونداي- اق جوعارى ساپالى ورگانيكالىق ونىمدەردىڭ ەكسپورتىن ارتتىرۋعا دايىن.

ءوز كەزەگىندە يانۋش ۆويچەحوۆسكي قۇرمەت كورسەتكەنى ءۇشىن پرەزيدەنتكە ريزاشىلىعىن ءبىلدىردى.

مەنىڭ قازاقستانمەن ەرەكشە بايلانىسىم تۋرالى ايتتىڭىز. ءيا، انام ەكىنشى دۇنيەجۇزىلىك سوعىس كەزىندە قازاقستاندا التى جىل ءومىر ءسۇردى. انام سول قيىن- قىستاۋ شاقتا قازاق حالقى ولارعا مەيىرىمدىلىك تانىتقانىن ۇنەمى ايتىپ وتىراتىن. سوندىقتان مەنىڭ قازاقستانعا دەگەن كوڭىلىم ەرەكشە. ءسىزدى استانا حالىقارالىق فورۋمىن تابىستى وتكىزۋىڭىزبەن قۇتتىقتايمىن. ءسىزدىڭ سويلەگەن ءسوزىڭىزدى ايرىقشا ىقىلاسپەن تىڭدادىم. دۇرىس ايتاسىز، بىزگە سىن- قاتەرلەردى انىقتاپ، تۇيتكىلدەردى شەشۋ ءۇشىن ورتاق ديالوگ قاجەت. جاھاندىق دەڭگەيدەگى قازىرگى كۇردەلى ماسەلەنىڭ ءبىرى - ازىق- تۇلىك قاۋىپسىزدىگى، - دەدى ەۋروكوميسسار.

سوڭعى جاڭالىقتار